மெத்தனத்தில் அதிகாரிகள்! பரிதவிக்கும் நெசவாளர்கள்!

ஊருக்கெல்லாம் தீபாவளி ஆடைகளை நெய்துகொடுத்த கைத்தறி நெசவாளர்கள் தங்கள், தங்கள் வீடுகளில் இருண்டு போய்க் கிடக்கிறார்களாம்.

- ஜீவாதங்கவேல்

என்ன நடந்தது? தமிழகம் முழுக்க கூட்டுறவுத்துறையின் கீழ் 840 கூட்டுறவு சங்கங்கள் இயங்குகின்றன. இதில் ஏறக்குறைய 40 ஆயிரம் நெசவாளர்கள் உறுப்பினர்களாக இருக்கிறார்கள். இவர்கள் துணி உற்பத்தியில் ஈடுபட்டு, கூட்டுறவு சங்கங்களில் தங்களுக்கான கூலியை பெற்று வருகிறார்கள். ஒவ்வொரு வருடமும் இந்த நெசவாளர்களுக்கு போனஸ் வழங்குவது கைத்தறி துறையின் வழக்கம்.

கூட்டுறவு சங்கங்களில் உற்பத்தியாகும் துணிகளுக்கு வருடத்தில் மூன்று, நான்கு முறை 20 சதவீதம் மானியம் வழங்கப்பட்டு வந்தது. இந்த மானியத் தொகையை அரசே சம்பந்தப்பட்ட கூட்டுறவு சங்கங்களுக்கு வழங்கும்.

குறிப்பிட்ட காலத்தில் இந்த மானியத் தொகையை கூட்டுறவு சங்கங்களுக்கு வழங்கினால் தான், கூலி உட்பட நெசவாளர்களுக்கான அனைத்து நிதிப் பயன்களையும் சங்கங்களால் கொடுக்க முடியும்.

ஆனால் இந்த விசயத்தில்தான் அதிகாரிகள் குளறுபடி செய்கிறார்களாம்.

அந்தந்த காலகட்டத்தில் மானியத்தொகையை சங்கங்களுக்கு இவர்கள் விடுவிப்பதில்லை என்கிறார்கள்.