கொலையா, தற்கொலையா?

அரியலூர் மாவட்டம் மீன்சுருட்டி அருகேயுள்ள பாகல்மேடு கிராமத்தில் பிளஸ் ஒன் படிக்கும் மாணவனுக்கும் மாணவிக்கும் ஏற்பட்ட காதல், மாணவனின் உயிரைப் பறித்துள்ளது.

- எஸ்.பி.எஸ்

பாகல்மேடு கிராமத்தைச் சேர்ந்த கல்யாணசுந்தரத்தின் மகன் கதிர்செல்வன். தந்தை கல்யாணசுந்தரம் இறந்துபோக, அவனது தாயார் ராசாக்கிளிதான் மகனைப் படிக்கவைத்து வருகிறார்.

இந்த நிலையில், கடந்த மாதம் 11-ஆம் தேதி காலை நண்பனைப் பார்த்துவிட்டு வருகிறேன் என்று கூறிச்சென்றவர், அன்று மாலை வரை வீடு வந்து சேரவில்லை. உடனே மகனது செல்போனைத் தொடர்பு கொண்டுள்ளார். "நண்பன் வீட்டில் தங்கியிருக்கிறேன், வந்துவிடுகிறேன்" கதிர்செல்வன் கூறியுள்ளார்.

மறுநாள் காலை வரை மகன் வராததால், அவனது செல்போனுக்கு மீண்டும் தொடர்பு கொண்டுள்ளார். அந்த செல்போன் ஸ்விட்ச்ஆப் ஆகியிருந்தது. அவரும் அவரது உறவினர்களும் அக்கம்பக்கத்து கிராமங்களுக்கு சென்று மகனைத் தேடியிருக்கிறார்கள். அன்று மதியம், இவர் தன் மகனைத் தேடுவதையறிந்து அந்த ஊர்வழியாக வந்த ஒருவர், "உனது மகன் குருவாலப்பர்கோவில் என்ற ஊரில் ஒரு வீட்டின் பின்புறமுள்ள குப்பைமேட்டில் பிணமாகக் கிடக்கிறான்" என்ற தகவலைத் தெரிவித்துள்ளார். இதைக் கேட்டு அலறித் துடித்த அந்த மாணவனின் தாயார் அங்கு ஓடினார். மீன்சுருட்டி போலீசாரும் அங்கு விசாரணை நடத்திக் கொண்டிருந்தனர்.