சீமான் மாறிவிட்டார்

நாம் தமிழர் கட்சிக்குள் சமீபகாலமாக பிளவுகள் ஏற்பட ஆரம்பித்துள்ளது.

- துரை.மகேஷ்

அதனை பிரதிபலிக்கும்விதமாக நவம்பர் 27-ஆம் தேதி, திருச்சி உழவர் தமிழர் ஒருங்கிணைப்பு இயக்கம் சார்பில் மாவீரர் நாள் அனுசரிக்கப்பட்டது. இந்தக் கூட்டத்தினை நாம் தமிழர் கட்சியிலிருந்து வெளியேறிய மாநில, மண்டல, மாவட்ட அளவிலான நிர்வாகிகள் இணைந்து நடத்தியுள்ளனர்.

நாம் தமிழர் கட்சியில் மாநில அளவிலான நிர்வாகிகளாக இருந்த வெற்றிக்குமரன், நவம்பர் 26-ஆம் தேதி திருச்சியில் செயலாளர் சந்திப்பு ஒன்றை நடத்தினார்.

அந்தச் சந்திப்பின்போது, "நாம் தமிழர் கட்சியின் கொள்கைகள், சித்தாந்தங்கள் அனைத்தும் எங்களுடையதுதான். எனவே நாங்கள் அதை ஆதரிக்கிறோம். ஆனால் சீமானை ஆதரிக்கவில்லை. அதற்குக் காரணம், நாம் தமிழர் கட்சி சீமானுக்குச் சொந்தமானதோ அல்லது சீமான் தொடங்கியதோ இல்லை. நாங்கள் எல்லாரும் இந்தக் கட்சி ஆரம்பிக்கும் காலத்திற்கு முன்பு ஒரு இயக்கமாகச் செயல்பட்டு வந்தோம். அப்போது சீமானின் பேச்சில் ஒரு வசியம் இருந்தது. அதனால் நாங்கள் கட்சியின் ஒருங்கிணைப்பாளராகச் செயல்படுங்கள் என்று கூறி அவரை முன் நிறுத்தினோம். அதன்பிறகு எந்த ஒரு அறிக்கையாக இருந்தாலும், மேடையில் பேசுவதாக இருந்தாலும், எந்த ஒரு முடிவெடுப்பதாக இருந்தாலும் அனைவருடனும் கலந்து பேசி, அவர்களுடைய கருத்துக்களைக் கேட்டு இறுதியாக முடிவுசெய்து செயல்படுவோம்.