హైదరాబాద్లో లో 50వేలమంది సభ్యులతో సైక్లింగ్ మహోద్యమం

సైకిల్ సవారీకి హైదరాబాదీలు జై కొడుతున్నారు. ఆరోగ్య పరిరక్షణకు ఉపయోగపడుతున్న సైక్లింగ్ హైదరాబాద్ లో మహోద్యమంలా సాగుతోంది.

ప్రపంచ సైకిల్ దినోత్సవాన స్పెషల్ స్టోరీ.

సైకిల్... ఒకప్పుడు పేదల రవాణాకు ఉపయోగపడే వాహనం...నేడది కార్లలో షికారు చేసే బడా బాబులకు కూడా సైకిల్ సవారీ నిత్యకృత్యంగా మారింది. హైదరాబాద్ నగరంలో పర్యావరణ పరిరక్షణతోపాటు ఆరోగ్యం కోసం కార్లను వదిలి సైకిళ్లపై సవారీకి క్రేజ్ పెరిగింది. సైకిల్ సవారీని ప్రోత్సహించేందుకు ఏర్పాటైన హైదరాబాద్ సైక్లింగ్ రెవెల్యూషన్ స్వచ్ఛంద సంస్థలో 50వేల మంది సభ్యులున్నారంటే సైక్లింగ్ పట్ల హైదరాబాదీలు మక్కువ చూపిస్తున్నారని విదితమవుతోంది.

జూన్ 2వతేదీ... ప్రపంచ సైకిల్ దినోత్సవాన్ని పురస్కరించుకుని హైదరాబాద్ సైక్లింగ్ రెవెల్యూషన్ హైదరాబాద్ ఔటర్ రింగ్ రోడ్డులో కేఎంవీ ప్రాజెక్టు ఆఫీసు నుంచి ఉదయం 6 గంటల నుంచి సైక్లింగ్ ప్రత్యేక ఈవెంట్ నిర్వహించారు.ఈ ఈవెంటులో సైక్లింగ్ పట్ల తమకున్న ప్రేమను ప్రదర్శించడానికి ఈవెంటులో డ్రాయింగ్, పెయింటింగ్, స్కెచ్, గ్రాఫిక్ డిజైన్ పోస్టర్లు, ఛాయాచిత్రాల ప్రదర్శనను హైదరాబాద్ సైక్లింగ్ రెవెల్యూషన్ సభ్యులు చేపట్టారు.

ఆరోగ్య పరిరక్షణ కోసం సైక్లింగ్ చేద్దాం రండి

ప్రపంచ సైకిల్ దినోత్సవం 2024 కేవలం ఒక వేడుక మాత్రమే కాదు. భవిష్యత్ తరాలకు సురక్షితమైన, ఆరోగ్యకరమైన స్థిరమైన పట్టణ వాతావరణాన్ని సృష్టించడమే మా లక్ష్యం అంటారు.హైదరాబాద్ సైక్లింగ్ రెవెల్యూషన్ మేయర్ సంతాన సెల్వన్.హైదరాబాద్ లో యాక్టివ్ మొబిలిటీని ప్రోత్సహించేందుకు ఈ కార్యక్రమాన్ని చేపట్టారు. అన్ని వయసుల సైక్లింగ్ ఔత్సాహికులు ఈవెంట్లో చేరాలని ఆయన కోరారు. ఆరోగ్య పరిరక్షణ కోసం సైక్లింగ్ చేద్దాం రండి అంటూ సెల్వన్ పిలుపునిచ్చారు.