అన్నా క్యాంటీన్ పేదలకు గొప్ప వరం

* జిల్లా కలెక్టర్ డా.ఎస్. వెంకటేశ్వర్ * కూటమి ప్రభుత్వం పేదల పక్షపాతి * ఎమ్మెల్యే కొరుగొండ్ల రామకృష్ణ

తిరుపతి కలెక్టరేట్ ఆంధ్రనాడు, అక్టోబర్ 23 పేదలకు నామ మాత్రపు ధరతో ఆకలి తీర్చేందుకు రాష్ట్ర ప్రభుత్వ ఉన్నతమైన ఆశయానికి అనుగుణంగా ఎన్టీఆర్ అన్నా క్యాంటీన్ లను జిల్లాలోని పలు నియోజక వర్గాలలోని మునిసిపల్ పరిధిలో ప్రారంభించి వారికి కడుపు నిండా నాణ్యమైన ఆహారం అందిస్తున్నామని, ఈ కార్యక్రమం పేదలకు గొప్ప వరం అని జిల్లా కలెక్టర్ డా.ఎస్. వెంకటేశ్వర్ మరియు వెంకటగిరి ఎమ్మెల్యే కొరుగొండ్ల రామకృష్ణ సంయుక్తంగా పేర్కొన్నారు. బుధవారం వెంకటగిరి పట్టణంలో ఎంపిడిఓ కార్యాలయం సమీపంలో రూ. 16.86 లక్షల వ్యయంతో అన్నా క్యాంటీన్ పునరుద్ధరణ పనులను చేపట్టి పలు వసతులు ఏర్పాటు చేసిన ఎన్టీఆర్ అన్నా క్యాంటీన్ ను జిల్లా కలెక్టర్ మరియు ఎమ్మెల్యే సంయుక్తంగా ప్రారంభించారు.ముందుగా ఎన్టీఆర్ గారి చిత్ర పటానికి పుష్పాంజలి ఘటించి జ్యోతి ప్రజ్వలన చేసి ప్రారంభించారు. అనంతరం పేదలకు రూ. 5 లకే అందిస్తున్న భోజనం కలెక్టర్ మరియు ఎమ్మెల్యే వడ్డించారు. అనంతరం వారు పేదలతో కలిసి క్యాంటీన్లో భోజనం చేశారు.