சூரனை சம்ஹாரம் செய்தார் ஜெயந்திநாதர்

திருச்செந்தூர் சுப்பிரமணிய சுவாமி கோயிலில் கந்தசஷ்டி திருவிழாவின் சிகரமாக கடற்கரையில் லட்சக்கணக்கான பக்தர்களின் அரோகரா கோஷம் விண்ணதிர முழங்க சூரனை, ஜெயந்திநாதர் சம்ஹாரம் செய்தார்.

முருகப் பெருமானின் அறுபடை வீடுகளில் 2ம் படை வீடான திருச்செந்தூர் சுப்பிரமணிய சுவாமி கோயிலில், ஸ்தல புராணத்தை உணர்த்தும் கந்தசஷ்டி திருவிழா, கடந்த 2ம் தேதி தொடங்கியது. விழாவில் தினமும் யாகசாலை பூஜைகள், சுவாமி ஜெயந்திநாதர் வள்ளி, தெய்வானையுடன் எழுந்தருளல், தங்கச் சப்பரத்தில் சண்முக விலாச மண்டபத்தில் காட்சி, தீபாராதனை நடந்து வந்தது.

விழாவின் சிகர நிகழ்ச்சியான சூரசம்ஹாரம் நேற்று நடைபெற்றது. இதையொட்டி திருக்கோயில் நடை அதிகாலை 1 மணிக்கு திறக்கப்பட்டு, 1.30 மணிக்கு விஸ்வரூபம், 2 மணிக்கு உதயமார்த்தாண்ட அபிஷேகம், தீபாராதனை, அதிகாலை 4 மணிக்கு கால சந்தி பூஜை நடைபெற்றது. சஷ்டியை முன்னிட்டு மூலவருக்கு வைர கிரீடமும், தங்க அங்கியும் அணிவிக்கப்பட்டது. விரதமிருந்து வந்த பக்தர்கள் கடலில் புனித நீராடியும், அங்கப்பிரதட்சணம் மற்றும் காவடி எடுத்து வந்தும் தரிசித்தனர்.

காலை 6 மணியளவில் சுவாமி ஜெயந்திநாதர் யாகசாலையில் எழுந்தருளினார். அங்கு ஹோமங்களுடன் சுவாமிக்கு அபிஷேகம் மற்றும் அலங்காரம் நடைபெற்றது. மதியம் மூலவரான சுப்பிரமணியருக்கு சஷ்டி சிறப்பு தீபாராதனை, உச்சிக்கால தீபாராதனையும், யாகசாலையில் ஜெயந்திநாதருக்கு சிறப்பு தீபாராதனையாகி சுவாமி, அம்மனுடன் தங்கச் சப்பரத்தில் எழுந்தருளி சண்முகவிலாசம் வந்தடைந்தார். அங்கு மகா தீபாராதனை நடந்தது. பின்னர் சுவாமி ஜெயந்திநாதர் திருவாவடுதுறை ஆதீன கந்த சஷ்டி மண்டபத்திற்கு வந்து, அங்கு சிறப்பு அபிஷேகம் மற்றும் சர்வ அலங்காரமாகி திருக்கோயிலில் வேல்பூஜை நடைபெற்றது.