சட்டவிரோத பணப்பரிமாற்ற விவகாரம் லாட்டரி மார்ட்டின் வீட்டில் ஈடி சோதனை

• விடுதலை சிறுத்தைகள் துணை பொதுச் செயலாளர் ஆதவ் அர்ஜூனா வீட்டிலும் ரெய்டு • முக்கிய ஆவணங்கள் சிக்கின

சட்டவிரோதமாக 40 நிறுவனங்களில் பல கோடி ரூபாய் முதலீடு செய்த விவகாரம் தொடர்பாக பிரபல தொழிலதிபர் லாட்டரி மார்ட்டின் மற்றும் அவரது மருமகனும் விடுதலைச் சிறுத்தைகள் கட்சியின் துணை பொதுச்செயலாளருமான ஆதவ் அர்ஜூனாவுக்கு சொந்தமான சென்னை, கோவை உள்பட 7 இடங்களில் நேற்று அமலாக்கத்துறை அதிகாரிகள் சோதனை நடத்தினர். இந்த சோதனையில் வழக்கு தொடர்பான சொத்து விவரங்கள், தேர்தல் பத்திரம் நன்கொடை வழங்கிய விவரங்கள் உள்ளிட்ட முக்கிய ஆவணங்களை கைப்பற்றினர். இதுதொடர்பாக, அதிகாரிகள் விசாரணை நடத்தி வருகின்றனர்.

கோவை மேட்டுப்பாளையம் சாலை துடியலூர் அருகே உள்ள வெள்ளக்கிணறு பகுதியை சேர்ந்தவர் மார்ட்டின். பிரபல தொழிலதிபரான இவர், நாடு முழுவதும் லாட்டரி சீட்டு விற்பனை, ரியல் எஸ்டேட் உள்ளிட்ட பல்வேறு தொழில்களை செய்து வருகிறார். சிக்கிம் மாநிலத்தில் கடந்த 2009 மற்றும் 2010ம் ஆண்டுகளில் அரசின் லாட்டரி சீட்டுகளை தொழிலதிபர் மார்ட்டின் அச்சடித்து விற்பனை செய்ததில் பல நூறு கோடி முறைகேடாக சம்பாதித்து நாடு முழுவதும் 40 நிறுவனங்களில் முதலீடு செய்ததாக குற்றச்சாட்டு எழுந்தது. இதுகுறித்து சிக்கிம் அரசு புகாரின்படி லாட்டரி சீட்டு மோசடி தொடர்பாக சிபிஐ விசாரணைக்கு உத்தரவிடப்பட்டது.