மகாராஷ்டிராவில் 3வது முறையாக முதல்வராக பட்நவிஸ் பதவி ஏற்பு

ஏக்நாத் ஷிண்டே, அஜித் பவார்-துணை முதல்வர்கள் பிரதமர் மோடி, அமித்ஷா, அம்பானி, பிரபல நடிகர்கள் பங்கேற்பு

மகாராஷ்டிரா மாநில முதல்வராக 3வது முறையாக தேவேந்திர பட்நவிஸ் பதவியேற்றுக் கொண்டார். துணை முதல்வர்களாக ஏக்நாத் ஷிண்டேயும், அஜித்பவாரும் பதவியேற்றுக் கொண்டனர். இவர்களுக்கு ஆளுநர் சி.பி.ராதாகிருஷ்ணன் பதவிப் பிரமாணமும், ரகசியக் காப்புப் பிரமாணமும் செய்து வைத்தார். விழாவில், பிரதமர் மோடி, பாஜ மற்றும் கூட்டணி கட்சிகளின் தலைவர்கள் பங்கேற்றனர்.

மகாராஷ்டிராவில் பாஜ, சிவசேனா மற்றும் தேசியவாத காங்கிரஸ் உள்ளிட்ட கட்சிகள் அடங்கிய ஆளும் மகாயுதி கூட்டணி 235 இடங்களில் வெற்றி பெற்றது. இருப்பினும், முதல்வர் யார் என முடிவு செய்யாததால், புதிய அரசு பதவியேற்கவில்லை. தேர்தல் முடிவு வெளியாகி 12 நாள் இழுபறிக்குப் பிறகு, நேற்று முன்தினம் நடந்த பாஜ எம்எல்ஏக்கள் கூட்டத்தில், அந்த கட்சியின் சட்டமன்ற தலைவராக தேவேந்திர பட்நவிஸ் தேர்வு செய்யப்பட்டார். அவர் முதல்வராக பதவியேற்பார் என அறிவிக்கப்பட்டது. இந்த கூட்டணியில் தேசியவாத காங்கிரஸ் அஜித்பவார் துணை முதல்வர் பதவிக்கு ஏற்கனவே சம்மதம் தெரிவித்து விட்டார். ஆனால், ஷிண்டேயிடம் நிருபர்கள் இது பற்றி கேட்டபோது, ‘‘காத்திருங்கள், சொல்கிறேன்’’ என்றார்.

இதனால், ஷிண்டே துணை முதல்வர் பதவியை ஏற்பாரா என்ற கேள்விக்கான பதில் மர்மமாகவே இருந்தது. ஷிண்டே முதல்வர் பதவிதான் வேண்டும் என நெருக்கடி கொடுத்ததாகவும், அவ்வாறு முதல்வர் பதவி அவருக்குத் தரப்படவில்லை என்றால், தனது மகன் ஸ்ரீகாந்த் ஷிண்டேவுக்கு முதல்வர் பதவியை வழங்க வேண்டும் என நிபந்தனை வைத்ததாகவும் தகவல்கள் வெளியாகின. ஆனால், துணை முதல்வர் பதவிக்கு ஆசைப்படவில்லை என, ஸ்ரீகாந்த் ஷிண்டே தெளிவுபடுத்தி விட்டார்.