புதுப்பிக்கத்தக்க மின் உற்பத்தியில் தமிழ்நாடு முதலிடம் நாட்டிலேயே மிகக் குறைந்த விலையில் மின்சாரம் வழங்குவது உறுதி செய்யப்படும்

புதுப்பிக்கத்தக்க மின் உற்பத்தியில் தமிழ்நாடு முதலிடத்தில் உள்ளது என்றும் நாட்டிலேயே மிகக் குறைந்த விலையில் மின்சாரம் தொடர்ந்து வழங்குவது உறுதி செய்யப்படும் என மின் வாரியம் தெரிவித்துள்ளது.

இது குறித்து தமிழ்நாடு மின்சார வாரியம் வெளியிட்ட அறிக்கை: புதுப்பிக்கத்தக்க எரிசக்தி உற்பத்தியில் நாட்டிற்கே தமிழ்நாடு முன்னோடியாக திகழ்ந்து வருகிறது. நாட்டிலேயே முதல் முறையாக 1986ம் ஆண்டில் காற்றாலை மூலமாக தமிழ்நாட்டில் மின் உற்பத்தி செய்யப்பட்டது. காற்றாலை மின் உற்பத்தியில் சுமார் 11,000 மெகா வாட் நிறுவு திறனுடன் இந்தியாவிலேயே இரண்டாவது இடமும், சூரிய ஒளிச்சக்தி மின்சார உற்பத்தியில் சுமார் 9,400 மெகா வாட் நிறுவு திறனுடன் நாட்டிலேயே மூன்றாவது இடமும் தமிழ்நாடு பெற்றுள்ளது. புதுப்பிக்கத்தக்க எரிசக்திக்கென தனியே தமிழ்நாடு பசுமை மின்உற்பத்தி நிறுவனம் தமிழ்நாடு அரசால் உருவாக்கப்பட்டு மிகச்சிறப்பான பணியினை செய்து வருகிறது.