கூட்டாட்சி தத்துவம் பாதிக்கப்படுகிற நிலையில் மாநில உரிமையை பாதுகாப்பதில் நீதித்துறைக்கு முக்கிய பங்கு

மெட்ராஸ் பார் அசோசியேஷன் விழாவில் முதல்வர் மு.க.ஸ்டாலின் பேச்சு

அரசமைப்புச் சட்டத்தின் அடிப்படை கட்டமைப்புகளில் ஒன்றான கூட்டாட்சித் தத்துவம் பாதிக்கப்படுகின்ற நிலை சமீப காலமாக காணப்படுகிறது. மாநிலங்களுடைய உரிமைகளைப் பாதுகாப்பதில் நீதித்துறை தொடர்ந்து முக்கிய பங்கு வகிக்கிறது என்று முதல்வர் மு.க.ஸ்டாலின் பேசினார்.

சென்னை உயர் நீதிமன்ற வளாகத்தில் உள்ள பழமையான மெட்ராஸ் பார் அசோசியேஷனின் 150வது ஆண்டு விழா நேற்று நடந்தது. மெட்ராஸ் பார் அசோசியேஷன் தலைவர் எம்.பாஸ்கர் தலைமை வகித்தார். இதில், மூத்த வழக்கறிஞர்கள் முன்னாள் அட்டர்னி ஜெனரல் கே.பராசுரன், கே.கே.வேணுகோபால் ஆகியோர்களுக்கு வாழ்நாள் சாதனையாளர் விருது வழங்கப்பட்டது.

விழாவில் தமிழக முதல்வர் மு.க.ஸ்டாலின், உச்ச நீதிமன்ற நீதிபதிகள் எம்.எம்.சுந்தரேஷ், ஆர்.மகாதேவன், விஸ்வநாதன், சென்னை உயர் நீதிமன்ற தலைமை நீதிபதி கே.ஆர்.ஸ்ரீராம், தமிழக சட்டத்துறை அமைச்சர் ரகுபதி ஆகியோர் கலந்து கொண்டனர்.

முதல்வர் மு.க.ஸ்டாலின் விழா மலரை வெளியிட்டு பேசியதாவது: நீதிபதி எம்.எம்.சுந்தரேஷ் இங்கு உரையாற்றியபோது ஒரு இக்கட்டான நிலையில் நின்று கொண்டிருக்கிறேன் என்று சொன்னார். ஒரு நீதிபதி தமிழில் பேசுவார் என்று நினைத்தோம். அவர் ஆங்கிலத்தில் பேசினார்.