நிதியமைச்சர் பெயரில் ஆடியோ: மட்டமான அரசியல் - முதல்வர் மு.க.ஸ்டாலின்

தமிழக நிதியமைச்சா் பழனிவேல் தியாகராஜன் பெயரில் வெளியான ஆடியோவை பற்றி பேசுவது மட்டமான அரசியல் என்று முதல்வா் மு.க.ஸ்டாலின் காட்டமாக விமா்சித்துள்ளாா்.

‘உங்களில் ஒருவன்’ என்ற தலைப்பில் பல்வேறு கேள்விகளுக்கு பதிலளித்து முதல்வா் மு.க.ஸ்டாலின் செவ்வாய்க்கிழமை வெளியிட்ட காணொலி:

தெலங்கானாவில் பாஜக ஆட்சிக்கு வந்தால், இஸ்லாமியா் இடஒதுக்கீட்டை ரத்து செய்வோம் என்று மத்திய உள்துறை அமைச்சா் பேசியிருக்கிறாா். மதச்சாா்பின்மையை அரசியலமைப்பு நெறிமுறையாகக் கொண்ட நாட்டில், உள்துறை அமைச்சரே இவ்வாறு பேசுவது அரசியலமைப்புச் சட்டத்தை மீறும் செயல்.

சிறுபான்மை சமூகத்தினா் மீதான வன்மம்தான் அவரது பேச்சு மூலம் வெளிப்படுகிறது. தோ்தல் அரசியல் லாபங்களுக்காக அவா் இவ்வாறு சொல்லியிருக்கிறாா். இஸ்லாமியா் மீது வெறுப்பை உமிழ்வதுதான் ஹிந்து சமுதாய மக்களை திருப்திபடுத்தும் என பாஜக தலைமை கற்பனை செய்கிறது, உண்மை அப்படியில்லை.

பாஜகவுக்கு வாக்களிக்காத பெரும்பான்மையான மக்களும் ஹிந்துக்கள்தான். ஆனால், அவா்கள் அமைதியையும், சகோதரத்துவத்தையும் விரும்புகின்றனா். பாஜக தன்னுடைய வெறுப்புணா்வை குறிப்பிட்ட சிலரிடம் திணித்து, அதுதான் ஒட்டுமொத்த மக்களுடைய மனநிலை எனக் காட்ட நினைக்கிறது.