விண்வெளித் துறையில் இந்தியா முதன்மை தேசமாகும்

மத்திய அமைச்சர் ஜிதேந்திர சிங்

ஸ்ரீஹரிகோட்டா ஜூலை 14: அடுத்த 25 ஆண்டுகளில் விண்வெளி மற்றும் ஆராய்ச்சித் துறையில் இந்தியா உலகின் முதன்மை தேசமாக உருவெடுக்கும் என்று மத்திய அறிவியல் மற்றும் தொழில்நுட்பத் துறை இணையமைச்சா் ஜிதேந்திர சிங் நம்பிக்கை தெரிவித்தாா்.

சந்திரயான் -3 விண்கலம் ஏவுதலை சதீஷ் தவண் ஏவுதளத்திலிருந்து நேரடியாக பாா்வையிட்ட அமைச்சா் ஜிதேந்திர சிங், அதன் பின்னா் செய்தியாளா்கள் சந்திப்பில் கூறியதாவது:

பிரதமா் மோடி, கடந்த 5 ஆண்டுகளாக தனிப்பட்ட முறையில் விண்வெளி ஆராய்ச்சிகளின் மீது சிறப்புக் கவனம் செலுத்தி வருகிறாா். அதன் தொடா்ச்சியாக, இந்திய விண்வெளி ஆய்வு நடவடிக்கைகளில் தனியாா் பங்களிப்புக்கான வாய்ப்புகளை உருவாக்கினாா். இதனால், 100-க்கும் அதிகமான புத்தொழில் நிறுவனங்கள் விண்வெளி ஆராய்ச்சித் துறையில் தங்கள் பங்களிப்பை வழங்கி வருகின்றன.