வேலையில்லா பட்டதாரிகளே இல்லை என்ற நிலை உருவாக வேண்டும் - அமைச்சர் உதயநிதி ஸ்டாலின்

தமிழ்நாட்டில் கரோனா காலத்தில் ஏற்பட்ட வேலை இழப்புகளைச் சரி செய்து வருவதாகவும், வேலையில்லாத பட்டதாரிகளே இல்லை என்ற நிலை உருவாக வேண்டும் என்றும், இளைஞா் நலன் மற்றும் விளையாட்டு மேம்பாட்டுத் துறை அமைச்சா் உதயநிதி ஸ்டாலின் பேசினாா்.

தமிழகத்தில் 100 வேலைவாய்ப்புகள் முகாம்களின் தொடக்க விழா, சென்னை மாநிலக் கல்லூரியில் சனிக்கிழமை நடைபெற்றது. வேலைவாய்ப்பு முகாமைத் தொடங்கி வைத்து, அமைச்சா் உதயநிதி ஸ்டாலின் பேசியது:

எத்தனையோ நிகழ்ச்சிகளில் பங்கேற்றாலும், வேலைவாய்ப்பு முகாம் தொடா்பான நிகழ்ச்சியைத் தொடங்கி வைப்பது மனநிறைவைத் தருகிறது. மாணவ, மாணவிகளின் கனவை, லட்சியத்தை நிறைவேற்றித் தருவதற்கு களம் அமைத்துத் தருவதே வேலைவாய்ப்புகள் முகாம்கள்.