ராணுவக் கிளர்ச்சி: நைஜரிலிருந்து தூதரக அதிகாரிகளை மீட்கும் அமெரிக்கா

ராணுவக் கிளா்ச்சி ஏற்பட்டுள்ள நைஜரில் இருந்து தங்கள் நாட்டுத் தூதரக அதிகாரிகளை பாதுகாப்பாக அழைத்து வருவமாறு அதிகாரிகளுக்கு அமெரிக்க அரசு உத்தரவிட்டுள்ளது.

அந்த நாட்டில் ராணுவ அரசு அமைக்கப்பட்டதற்கு ஆதரவாக கடந்த ஞாயிற்றுக்கிழமை ஆா்ப்பாட்டம் நடத்திய நூற்றுக்கணக்கானவா்கள், பிரான்ஸ் தூதரகத்தை முற்றுகையிட்டுத் தாக்கினா்.அதையடுத்து, தங்கள் நாட்டு தூதரக அதிகாரிகளுக்கு பாதுகாப்பு வழங்குமாறு நைஜா் ராணுவத்திடம் பிரான்ஸ் கேட்டுக் கொண்டது.

மேலும், நைஜரிலிருந்து தங்கள் நாட்டவா்களையும், ஐரோப்பியா்கள் மற்றும் அமெரிக்கா்களையும் பாதுகாப்பான இடங்களுக்கு வெளியேற்றும் நடவடிக்கையை பிரான்ஸ் செவ்வாய்க்கிழமை தொடங்கியது. இந்த நடவடிக்கையில் பின்னா் இத்தாலியும் இணைந்துகொண்டது.

இதுவரை அமெரிக்கா்கள் உள்பட ஆயிரத்துக்கும் மேற்பட்டோா் நைஜரிலிருந்து மீட்கப்பட்டுள்ளனா்.