2 ஆண்டுகளில் ரூ.12 கோடி குட்கா பறிமுதல்

தமிழகத்தில் இரு ஆண்டுகளில் ரூ.12.56 கோடி மதிப்புள்ள 191.1 டன் குட்கா, பான்மசாலா பறிமுதல் செய்யப்பட்டுள்ளது. புகையிலைப் பொருள்கள் மீதான தடை மேலும் ஓராண்டு நீட்டிக்கப்பட்டுள்ளது என மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

அவா் புதன்கிழமை வெளியிட்ட செய்திக்குறிப்பு: பொதுமக்களுக்கு தரமான, பாதுகாப்பான உணவு வழங்கப்படுவதை உறுதி செய்யும் வகையில் தமிழ்நாடு உணவு பாதுகாப்புத் துறை பல்வேறு நடவடிக்கைகளை உணவு பாதுகாப்பு மற்றும் தரங்கள் சட்டம் -2006-இன் படி, மேற்கொண்டு வருகிறது.

அந்த வகையில், தமிழ்நாட்டில் ஷவா்மா, மீன் மற்றும் அனைத்து வகை அசைவ உணவுகளை விற்பனை செய்யும் 1,572 உணவகங்களில் தரமற்ற உணவு விற்பனை செய்வது கண்டறியப்பட்டு, 5018 கிலோ தரமற்ற இறைச்சி பறிமுதல் செய்யப்பட்டு அழிக்கப்பட்டது. ரூ.8 லட்சத்து 79,800 அபராதம் விதிக்கப்பட்டுள்ளது. உரிய சுகாதாரமில்லாமலும், தரம் குறைவான உணவு பொருள்களை வைத்திருந்த 23 கடைகளுக்கு சீல் வைக்கப்பட்டுள்ளது.