பட்டாசு ஆலை வெடி விபத்து: 10 பேர் உயிரிழப்பு

சிவகாசி அருகே சம்பவம்

விருதுநகர் மாவட்டம், சிவகாசி அருகே வியாழக்கிழமை பட்டாசு ஆலையில் ஏற்பட்ட வெடி விபத்தில் 6 பெண்கள் உள்பட 10 தொழிலாளர்கள் உயிரிழந்தனர். 13 தொழிலாளர்கள் காயமடைந்தனர். 8 அறைகள் இடிந்து தரைமட்டமாகின.

சிவகாசி அருகேயுள்ள செங்கமலப்பட்டியில் திருத்தங்கல் சிவகுமார் என்பவருக்குச் சொந்தமான பட்டாசு ஆலை உள்ளது. உரிமம் பெற்ற இந்த ஆலையில் மருந்துக் கலவை அறை, பட்டாசுகள் தயாரிக்கும் அறைகள் என மொத்தம் 15 அறைகள் உள்ளன.

இந்த ஆலையில் வியாழக்கிழமை 60 தொழிலாளர்கள் பணி புரிந்தனர். பிற்பகல் 2.30 மணியளவில் பேன்சிரக பட்டாசுகள் தயாரிக்கும் அறையில் மருந்து உராய்வு காரணமாக வெடி விபத்து ஏற்பட்டது. இந்த விபத்தில், பணியிலிருந்த தொழிலாளர்கள் சின்னையா புரம் பகுதியைச் சேர்ந்த விஜயகுமார் (28), மத்தியசேனை பகுதியைச் சேர்ந்த அழகர்சாமி (35), சந்திரசேகரன் மகன் ரமேஷ் (31), வி. சொக்கலிங்காபுரத்தைச் சேர்ந்த குருசாமி மகன் காளீஸ்வரன் (47), சிவகாசி ஆயுதப்படை குடியிருப்பு காந்திநகரைச் சேர்ந்த மச்சக்காளை மனைவி முத்து (57), மாயாண்டி மனைவி ஆவுடையம்மாள் (80), வேலுச்சாமி மனைவிலட்சுமி (47), சிவகாசி பகுதியைச் சேர்ந்த வசந்தி (38), பேச்சியம்மாள் (22), ஜெயலட்சுமி (42) ஆகிய 10 பேர் சம்பவ இடத்திலேயே உயிரிழந்தனர்.