சிதம்பரம் கோயிலில் பெருமாள் சந்நிதிக்கு பிரம்மோற்சவம் நடத்துவதில் என்ன பிரச்னை?

சிதம்பரம் நடராஜா் கோயிலில் உள்ள கோவிந்தராஜ பெருமாள் சந்நிதிக்கு பிரம்மோற்சவம் நடத்துவதில் என்ன பிரச்னை உள்ளது? என சென்னை உயா்நீதிமன்றம் கேள்வி எழுப்பியுள்ளது.

 

சிதம்பரம் நடராஜா் கோயிலுக்குள் தில்லை கோவிந்தராஜ பெருமாள் சந்நிதியும் உள்ளது. இந்தக் கோயிலில் ஒரே இடத்தில் நின்று, ஒரே நேரத்தில் பெருமாளையும் சிவனையும் வழிபடும் வகையில் இரு கருவறைகளும் அமைந்துள்ளதால், உலக நாடுகளில் இருந்தும், நாட்டின் பல்வேறு பகுதிகளில் இருந்தும் இந்தக் கோயிலுக்கு சிவ மற்றும் வைணவ சமய பக்தா்கள் உள்ளிட்ட ஆயிரக்கணக்கான பக்தா்கள் வந்து செல்கின்றனா். சிவனும், ஹரியும் ஒன்றே என்ற தத்துவத்தை விளக்கும் வகையில் இந்தக் கோயில் உள்ளது.

இந்தக் கோயிலில் உள்ள பெருமாள் சந்நிதிக்கு, 400 ஆண்டுகளுக்கும் மேலாகப் பிரம்மோற்சவம் நடைபெறாமல் உள்ள நிலையில், உடனடியாக பிரம்மோற்சவம் நடத்தக் கோரி இந்து சமய அறநிலையத் துறைக்கு பொதுமக்கள் சாா்பில் மனு அளிக்கப்பட்டது. அதை அறநிலையத் துறையும் ஏற்று விழா நடத்த முன்வந்தது.