5-ஆம் கட்டத் தேர்தல்: 60% வாக்குப்பதிவு

மக்களவைத் தேர்தல் 5-ஆம் கட்ட வாக்குப் பதிவில் திங்கள்கிழமை 60 சதவீத வாக்குகள் பதிவாகின.

நாட்டில் 18-ஆவது மக்களவையைத் தேர்வு செய்ய ஏழு கட்டங்களாக (ஏப்ரல் 19, 26, மே 7, 13, 20, 25, ஜூன் 1) தேர்தல் நடைபெற்று வருகிறது. ஏற்கெனவே நான்கு கட்ட வாக்குப் பதிவுகள் நிறைவடைந்த நிலையில், உத்தர பிரதேசத்தில் 14, மகாராஷ்டிரத்தில் 13, மேற்கு வங்கத்தில் 7, பிகார், ஒடிஸாவில் தலா 5, ஜார்க்கண்டில் 3, ஜம்மு-காஷ்மீர் மற்றும் லடாக் யூனியன் பிரதேசங்களில் தலா ஒரு தொகுதிக்கு 5-ஆம் கட்ட வாக்குப் பதிவு நடைபெற்றது.

உத்தர பிரதேச மாநிலத்தில் இடம்பெற்றுள்ள அமேதி, ரேபரேலி உள்ளிட்ட அரசியல் முக்கியத்துவம் வாய்ந்த மக்களவைத் தொகுதிகள் உள்பட 6 மாநிலங்கள் மற்றும் 2 யூனியன் பிரதேசங்களில் உள்ள 49 தொகுதிகளில் இந்த வாக்குப் பதிவு நடைபெற்றது.

மகாராஷ்டிர மாநிலத்தில் 54.29 சதவீத வாக்குகள் பதிவாகின. மேற்கு வங்க மாநிலத்தில் அதிகபட்சமாக 74.65 சதவீத வாக்குகள் பதிவாகின.

பிகாரில் 54.85 சதவீதம், ஜம்மு-காஷ்மீரில் 56.73 சதவீதம், ஜார்க்கண்டில் 63.07 சதவீதம், ஒடிஸாவில் 67.59 சதவீதம், உத்தர பிரதேசத்தில் 57.79 சதவீதம், லடாக்கில் 69.62 சதவீத வாக்குகள் பதிவாகின. ஒட்டுமொத்தமாக 60 சதவீத வாக்குகள் பதிவானதாக தேர்தல் ஆணையம் தரப்பில் தெரிவிக்கப்பட்டது.

பயங்கரவாத அச்சுறுத்துல் அதிகம் இருந்துவந்த ஜம்மு-காஷ்மீரின் பாரமுல்லா தொகுதியில் இதுவரை இல்லாத வகையில் 59 சதவீத வாக்குகள் பதிவாகின. கடந்த 1984-இல் 58.84 சதவீத வாக்குகள் பதிவானதே இந்தத் தொகுதியின் அதிகபட்ச வாக்குப் பதிவாக இதுவரை இருந்துவந்தது.