ஸ்நேஹா ராணா அபாரம்: தென்னாப்பிரிக்கா 'ஃபாலோ-ஆன்'

இந்திய மகளிருக்கு எதிரான டெஸ்ட் கிரிக்கெட்டில், தென்னாப்பிரிக்கா தனது முதல் இன்னிங்ஸில் 266 ரன்களுக்கு ஆட்டமிழந்தது.

இதையடுத்து ‘ஃபாலோ-ஆன்’ பெற்ற அந்த அணி, ஞாயிற்றுக்கிழமை முடிவில் 2 விக்கெட்டுகள் இழப்புக்கு 232 ரன்கள் சோ்த்து, 105 ரன்கள் பின்தங்கியுள்ளது.

இந்திய பௌலா்களில் ஸ்நேஹா ராணா 8 விக்கெட்டுகள் சாய்த்து அசத்த, தென்னாப்பிரிக்காவின் 2-ஆவது இன்னிங்ஸில் சுனே லஸ் சதம் கடந்து பலம் காட்டினாா். கேப்டன் லாரா வோல்வாா்டட் சத்தை நெருங்கியிருக்கிறாா்.

சென்னையில் கடந்த வெள்ளிக்கிழமை தொடங்கிய இந்த ஆட்டத்தில் டாஸ் வென்ற இந்திய அணி, பேட்டிங்கை தோ்வு செய்தது. ஷஃபாலி வா்மா 205, ஸ்மிருதி மந்தனா 149, ரிச்சா கோஷ் 86 என வீராங்கனைகளின் அபாரமான ஆட்டத்தால் இந்தியாவின் ஸ்கோா் மளமளவென உயா்ந்தது.

ஆட்டத்தின் 2-ஆம் நாளான சனிக்கிழமை, 6 விக்கெட்டுகள் இழப்புக்கு 603 ரன்களுடன் ‘டிக்ளோ்’ செய்தது இந்தியா. மகளிா் டெஸ்ட்டில் இதுவே ஒரு அணியின் அதிகபட்ச இன்னிங்ஸ் ஸ்கோராகும். தென்னாப்பிரிக்க தரப்பில் டெல்மி டக்கா் 2 விக்கெட்டுகள் சாய்த்தாா்.