அமலாக்கத் துறையைக் கண்டித்து முதல்வர் சித்தராமையா போராட்டம்

அரசியல் உள்நோக்கத்தோடு செயல்படுவதாக அமலாக்கத் துறையைக் கண்டித்து கர்நாடக முதல்வர் சித்தராமையா தலைமையில் காங்கிரஸ் அமைச்சர்கள், எம்.எல்.ஏ.க்கள் பெங்களூரில் செவ்வாய்க்கிழமை போராட்டத்தில் ஈடுபட்டனர்.

வால்மீகி பழங்குடியினர் வளர்ச்சிக் கழகத்தில் நடந்துள்ள ரூ. 187 கோடி முறைகேடு விவகாரத்தில் முதல்வர் சித்தராமையா, துணைமுதல்வர் டி.கே.சிவகுமார், முன்னாள் அமைச்சர் பி.நாகேந்திரா ஆகியோர் பெயர்களைக் குறிப்பிடுமாறு வளர்ச்சிக் கழகத்தின் முன்னாள் மேலாண் இயக்குநர் ஜே.ஜி.பத்மநாபை அமலாக்கத் துறை அதிகாரிகள் கட்டாயப்படுத்தி வருவதாகக் கிடைத்த தகவலின் அடிப்படையில், அரசியல் உள்நோக்கத்தோடு செயல்படுவதாக அமலாக்கத் துறையை கண்டித்து பெங்களூரு, விதான செüதா வளாகத்தில் உள்ள காந்திசிலை எதிரில் செவ்வாய்க்கிழமை முதல்வர் சித்தராமையா தலைமையில் காங்கிரஸ் அமைச்சர்கள். எம்.எல்.ஏ.க்கள் போராட்டம் நடத்தினர்.

போராட்டத்தில் துணை முதல்வர் டி.கே.சிவகுமார், அமைச்சர்கள் எம்.பி.பாட்டீல், ஜி.பரமேஸ்வர், ஜே.எச்.பாட்டீல், தினேஷ் குண்டுராவ், கிருஷ்ணபைரே கெüடா உள்ளிட்ட அமைச்சர்கள், காங்கிரஸ் எம்.எல்.ஏ.க்கள், எம்.எல்.சி.க்கள் கலந்து கொண்டனர். அப்போது மத்திய அரசு, அமலாக்கத் துறைக்கு எதிராக முழக்கங்களை எழுப்பினர்.

அப்போது, செய்தியாளர்களிடம் முதல்வர் சித்தராமையா கூறியதாவது: வால்மீகி பழங்குடியினர் வளர்ச்சிக் கழக முறைகேடு தொடர்பாக யூனியன் பேங்க் ஆஃப் இந்தியா அளித்த புகாரின் பேரில் சிபிஐ விசாரணை நடத்தி வருகிறது.