பாசனத்துக்கு மேட்டூர் அணை திறப்பு

மேட்டூர் அணையிலிருந்து காவிரி டெல்டா பாசனத்துக்கு ஞாயிற்றுக்கிழமை தண்ணீர் திறக்கப்பட்டது.

மேட்டூர் அணை பாசனம் மூலம் 12 காவிரி டெல்டா மாவட்டங்களில் 16.05 லட்சம் ஏக்கர் நிலங்கள் பாசன வசதி பெறுகின்றன.

மேட்டூர் அணையிலிருந்து ஆண்டுதோறும் ஜூன் 12-ஆம் தேதிமுதல் ஜனவரி 28-ஆம் தேதி வரை 230 நாள்களுக்கு 330 டி.எம்.சி. தண்ணீர் காவிரி டெல்டா பாசனத்துக்குத் திறக்கப்படும்.

நிகழாண்டு அணையில் போதிய நீர் இல்லாததால் பாசனத்துக்கு தண்ணீர் திறப்பு தாமதமாகி வந்தது. இந்நிலையில், கர்நாடக மாநிலத்தில் காவிரியின் நீர்ப்பிடிப்புப் பகுதிகளில் பெய்துவரும் பருவமழை காரணமாக அங்குள்ள கபினி அணை, கிருஷ்ணராஜ சாகர் அணைகள் நிரம்பியதால் அந்த அணைகளின் பாதுகாப்பு கருதி உபரி நீர் காவிரியில் திறக்கப்பட்டுள்ளது.

கடந்த 17-ஆம் தேதிமுதல் கர்நாடக அணைகளிலிருந்து உபரிநீர் மேட்டூர் அணைக்கு வரத் தொடங்கியதால், அணையின் நீர்மட்டம் வேகமாக அதிகரித்து, ஞாயிற்றுக்கிழமை 112 அடியாக உயர்ந்தது.