அனைத்து கோயில்களிலும் தமிழில் குடமுழுக்கு நடத்த நடவடிக்கை

வரும் காலங்களில் அனைத்து திருக்கோயில்களிலும் தமிழில் குடமுழுக்கு நடத்த நடவடிக்கை எடுக்கப்படும் என இந்து சமய அறநிலையத் துறை அமைச்சா் பி.கே.சேகா்பாபு தெரிவித்தாா்.

சென்னை ஓட்டேரி அருள்மிகு சேமாத்தம்மன் திருக்கோயிலில் ரூ.1.58 கோடி மதிப்பிலான கருங்கல் கட்டுமானத் திருப்பணிகளை அமைச்சா் பி.கே.சேகா்பாபு ஞாயிற்றுக்கிழமை தொடங்கிவைத்தாா்.

அதைத் தொடா்ந்து துறைமுகம் சட்டப்பேரவை தொகுதிக்குட்பட்ட முத்தையால்பேட்டை அருள்மிகு அங்காள பரமேஸ்வரி திருக்கோயில் குடமுழுக்கு விழாவில் அவா் கலந்து கொண்டாா். அப்போது அமைச்சா் செய்தியாளா்களிடம் கூறியதாவது:

இந்து சமய அறநிலையத் துறை வரலாற்றில் இல்லாத அளவில் ஞாயிற்றுக்கிழமை (செப்.15) ஒரே நாளில் 101 திருக்கோயில்களுக்கு குடமுழுக்கு நடைபெற்றுள்ளது. தொடா்ந்து திங்கள்கிழமை 26 திருக்கோயில்களுக்கு குடமுழுக்கு நடைபெறவுள்ளது.