சென்னை மெட்ரோ 2-ஆம் கட்டம்: திட்டச் செலவில் 65% மத்திய அரசு வழங்கும்

நிதியமைச்சகம் விளக்கம்

சென்னை மெட்ரோ ரயில் இரண்டாம் கட்ட திட்டம் மத்திய துறை திட்டமாக செயல்படுத்தப்படும் எனவும், திட்டச் செலவில் 65 சதவீதத்தை மத்திய அரசு வழங்கும் எனவும் மத் திய நிதியமைச்சகம் விளக்கம் அளித்துள்ளது.

இத்திட்டச் செலவுக்கான கடன் தொகையை பன்னாட்டு முகமைகளை அணுகிப் பெற்று சென்னை மெட்ரோ ரயில் நிறுவனத்துக்கு மத்திய அரசு நேரடியாக வழங்கும்.

கடனை திருப்பிச் செலுத்த வேண்டிய பொறுப்பு மெட்ரோ ரயில் நிறுவனத்தைச் சார்ந்தது எனவும் தெரிவிக்கப்பட்டுள்ளது.

இதுகுறித்து மத்திய நிதியமைச்சகம் சனிக்கிழமை வெளியிட்ட செய்திக்குறிப்பில் தெரிவிக்கப்பட்டிருப்பதாவது: சென்னை மெட்ரோ ரயில் திட்டத்தின் இரண்டாம் கட்டப் பணியை ரூ.63,246 கோடி மதிப்பீட்டுச் செலவில் மத்திய துறை திட்டமாக நிறைவேற்ற மத்திய அமைச்சரவை அண்மையில் ஒப்புதல் அளித்தது.

இதுவரை இந்தத் திட்டமானது, மதிப்பிடப்பட்ட திட்டச் செலவில் சுமார் 90 சதவீதம் அளவுக்கு தமிழக அரசின் பொறுப்பு என்ற நிலையில் மாநிலத் துறை திட்டமாகச் செயல் படுத்தப்பட்டு வந்தது.

மெட்ரோ ரயில் கொள்கை 2017இன் படி, நிலத்தின் விலை மற்றும் சில பொருள்களைத் தவிர்த்து, திட்டச் செலவில் 10 சதவீதம் நிதியளிப்பதே மத்திய அரசின் பங்காக இருந்தது.