போக்குவரத்து நெரிசலில் ஸ்தம்பித்த சென்னை: பொதுமக்கள் கடும் அவதி

விமானப் படை சாகச நிகழ்ச்சிக்காக, மெரீனா வில்லட்சக்கணக்கானோர் திரண்டதால் சென்னை மாநகர் முழுவதும் கடும் போக்குவரத்து நெரிசல் ஏற்பட்டு ஸ்தம்பித்தது. இதனால், பொது மக்கள் கடும் அவதியடைந்தனர்.

இந்திய விமானப்படையின் 92-ஆவது ஆண்டு தினத்தை முன்னிட்டு சென்னை மெரீனா கடற்கரையில் ஞாயிற்றுக்கிழமை நடை பெற்றது. இந்நிலையில் விமானப்படை சாகச நிகழ்ச்சிக்காக சென்னை மற்றும் சுற்றுவட்டாரப்பகுதிகளிலிருந்து லட்சக்கணக்கானோர் காலை முதலே மெரீனா கடற்கரைக்கு தங்கள் சொந்த வாகனங்கள் மற்றும் பேருந்துகள், ரயில்கள் மூலம் வரத் தொடங்கினர்.

ஆனால், தனியார் வாகனங்கள், பேருந்துகளுக்கு மெரீனா கடற்கரை சாலையில் செல்ல முடியாமல் போக்குவரத்து மாற்றம் செய்யப்பட்டிருந்ததால், காலை சுமார் 8 மணியில் இருந்தே போக்குவரத்து நெரிசல் தொடங்கியது.

நேரம் செல்ல செல்ல வாகனங்களில் வந்தவர்கள் ஏராளமானோர் கடற்கரைக்கு சுமார் 2 கி.மீ.-க்கு முன்பாகவே வாகனங்களை சாலையோரங்களில் நிறுத்தி விட்டு நடந்தே, கடற்கரைப் பகுதியில் சென்றதால், போக்குவரத்து ஸ்தம்பித்தது.

இந்நிலையில், நிகழ்ச்சி சுமார் 1 மணியளவில் நிறைவடைந்ததும், லட்சக்கணக்கான மக்கள் ஒரே நேரத்தில் தங்கள் இருப்பிடங்களுக்கு திரும்பிச் செல்ல முயற்சித்தனர்.