'முரசொலி' செல்வம் (83) காலமானார்

முதல்வர் மு.க.ஸ்டாலின், தலைவர்கள் அஞ்சலி

முரசொலி நாளிதழின் முன்னாள் ஆசிரியரும், எழுத்தாளருமான 'முரசொலி' செல்வம் (83), பெங்களூரில் வியாழக்கிழமை காலமானார்.

சென்னை கோபாலபுரத்திலுள்ள முன்னாள் முதல்வர் கருணாநிதியின் இல்லத்தில் வைக்கப்பட்டுள்ள அவரது உடலுக்கு முதல்வர் மு.க.ஸ்டாலின், அமைச்சர் துரைமுருகன், துணை முதல்வர் உதயநிதி ஸ்டாலின் மற்றும் அமைச்சர்கள் நேரில் அஞ்சலி செலுத்தினர். இறுதி நிகழ்வுகள் வெள்ளிக்கிழமை நடைபெறவுள்ளன.

முரசொலி நாளிதழில் 'சிலந்தி' எனும் பெயரில் விமர்சன கட்டுரைகளை எழுதி வந்த பன்னீர்செல்வம் என்ற 'முரசொலி செல்வம், 1941ஆம்ஆண்டு ஏப்ரலில் பிறந்தார்.

முன்னாள் முதல்வரான கருணாநிதியின் சகோதரி மகனான செல்வம், திரைப்படதயாரிப்புத் துறையிலும் முத்திரை பதித்தவர். மேகலா பிக்சர்ஸ், அஞ்சுகம்பிக்சர்ஸ்,பூம் புகார் புரொடக்ஷன்ஸ் ஆகிய திரைப்பட தயாரிப்பு நிறுவனங்களின் நிர்வாகப் பொறுப்பில் இருந்தார்.

முரசொலி ஆசிரியர்: முரசொலியில் ஆசிரியராக பொறுப்பு வகித்தாலும், புனைப்பெயரில் அவர் எழுதிய விமர்சன கட்டுரைகள் பல தரப்பினரின் கவனத்தை ஈர்த்தன. 55 ஆண்டுகளாக வைக்கப்பட்ட முரசொலியின் ஓர் அங்கமாகவே வாழ்ந்த அவர், முன்னாள் முதல்வர் கருணாநிதியின் மறைவுக்குப்பிறகும் அந்த நாளிதழின் பொலிவு குறையாமல் பார்த்துக் கொண்டார்.

பேரவையில் கூண்டு: கடந்த 1991-96-ஆம் ஆண்டு அதிமுக ஆட்சிக்காலத்தில் அவைக் குறிப்பில் இருந்து நீக்கப்பட்ட திமுக உறுப்பினர் பரிதி இளம்வழுதியின் பேச்சுகள் முர சொலியில் வெளியானதாக உரிமை மீறல் பிரச்னை எழுப்பப்பட்டது.

இதுகுறித்து விசாரித்த உரிமை மீறல் குழு நடவடிக்கை எடுக்க பரிந்துரைத்தது. அதன்படி, செல்வத்தை விசாரிக்க தனியாக கூண்டு தயாரிக்கப்பட்டு பேரவையில் வைக்கப்பட்டது. அதில், 'முரசொலி' செல்வம் நிறுத்தப்பட்டார். அதன்பிறகு. எந்த நடவடிக்கையும் இன்றி, பேரவையில் இருந்து வெளியேற செல்வத்துக்கு பேரவைத் தலைவர் சேடப்பட்டி முத்தையா உத்தரவிட்டார். 'முரசொலி' செல்வத்தின் துணிச்சலை பாராட்டி, கூண்டு கண்டேன் குதூகலம் கொண்டேன்' என்ற தலைப்பில் கருணாநிதி கடிதம் எழுதினார்.

83 வயதான நிலையில், முரசொலி செல்வம் பெங்களூரில் உள்ள தனது வீட்டில் வசித்து வந்தார். அங்கிருந் தபடியே முரசொலிக்கு கட்டுரைகளை எழுதி வந்தார்.