ரயில் விபத்து: என்ஐஏ விசாரணை

திருவள்ளூர்மாவட்டம்,பொன்னேரியை அடுத்த கவரைப்பேட்டையில் வெள்ளிக்கிழமை இரவு சரக்கு ரயில் மீது பாக்மதி விரைவு ரயில் மோதி விபத்துக்குளான சம்பவம் தொடர் பாகதேசிய புலனாய்வு முகமை (என் ஐஏ) விசாரணை நடத்தி வருகிறது.

கர்நாடக மாநிலம், மைசூரில் இருந்து பிகார் மாநிலம் தர்பங்காவுக்கு வெள்ளிக்கிழமைதோறும் காலை 10 மணிக்கு பாக்மதி விரைவு ரயில் இயக்கப்படுகிறது.

அந்த வகையில் வெள்ளிக்கிழமை (அக். 11) வழக்கம்போல் மைசூரில் இருந்து புறப்பட்ட ரயில் ஜோலார் பேட்டை, காட்பாடி, அரக்கோணம், பெரம்பூர், கும்மிடிப்பூண்டி வழித்தடத்தில் சென்று கொண்டிருந்தது.

இரவு 8.30 மணியளவில் பொன்னேரியை அடுத்த கவரைப்பேட்டை ரயில் நிலையம் அருகே சுமார் 90 கி.மீ. வேகத்தில் கடந்தபோது, ரயில் பிரதான பாதையில் இருந்து விலகி இணைப்புப்பாதைக்கு(லூப்லைன்) மாறியது. விரைவு ரயில் வழக்கமான பாதையில் இருந்து மாறியதை அறிந்த ரயில் ஓட்டுநர், உடனே ரயிலின் வேகத்தைக் குறைக்க முற்பட்டார். அப்போது அங்கு சரக்குரயில் நிறுத்தி வைக்கப்பட்டிருந்த நிலையில், பாக்மதி விரைவு ரயில் சுமார் 75 கி.மீ. வேகத்தில் சென்று சரக்கு ரயிலின் பின்புறம் மோதியது.

தடம் புரண்ட ரயில்: விபத்தில் ரயில் என்ஜின் மற்றும் 13 பெட்டிகள் அடுத்தடுத்து தடம் புரண்டு தண்டவாளத்தைவிட்டு கீழே இறங்கின. இதில் 6 பெட்டிகள் கவிழ்ந்தன. முன்பகுதியில் சரக்கு ஏற்றிச் செல்லும் பெட்டிகள் தீப்பிடித்து எரிந்தன.