யானைகள் ஊர்வலத்துடன் மைசூரு தசரா திருவிழா நிறைவு

மைசூரில் கடந்த 10 நாள்களாக நடைபெற்றுவந்த உலகப் புகழ்பெற்ற தசரா திருவிழா சனிக்கிழமை வண்ணமயமான யானைகள் ஊர்வலம், தீப்பந்த ஊர்வலத்துடன் நிறைவடைந்தது.

1610-ஆம் ஆண்டில் மைசூரு மன்னர் ராஜா உடையாரால் தொடங்கி வைக்கப்பட்டதசரா பெருவிழா,415ஆவது ஆண்டாக மைசூரில் அக். 3ஆம் தேதி தொடங்கி கடந்த 10 நாள்கள் கோலாகலமாகக் கொண்டாடப்பட்டது.

1971-ஆம் ஆண்டுமுதல் கர்நாடக மாநில அரசின் விழாவாக நடத்தப்பட்டு வரும் தசரா திருவிழாவையொட்டி பல்வேறு கலை, கலாசார, பண்பாட்டு நிகழ்ச்சிகள் நடைபெற்றன. இதன் நிறைவு பகுதியாக மைசூரில் சனிக்கிழமை யானை ஊர்வலம், தீப்பந்த ஊர்வலம் உள்ளிட்ட நிகழ்ச்சிகள் உற்சாகத்துடன் நடத்தப்பட்டன. மக்களும் பெருந்திரளாக கலந்துகொண்டனர்.

கொடி மரபூஜை: அம்பாவிலாஸ் அரண்மனையின் வடக்கு வாயிலில் (பலராமா நுழைவாயில்) சனிக்கிழமை பிற்பகல் நந்தி கொடிமர பூஜை செய்த முதல்வர் சித்தராமையா, கர்நாடக மக்களின் நல்வாழ்வுக்காக பிரார்த்தனை செய்து வழிபட்டார். இந்த விழாவில் துணை முதல்வர் டி.கே.சிவகுமார், அமைச்சர்கள் எச்.சி.மகாதேவப்பா, கே.வெங்கடேஷ், சிவராஜ் தங்கடகி, கே.எச்.முனியப்பா, எம்எல்ஏக்கள் ஜி.டி.தேவ கௌடா, தன்வீர் சேட், மாவட்ட ஆட்சியர் லட்சுமிகாந்த் ரெட்டி உள்ளிட்டோர் கலந்து கொண்டனர்.