ஷார்ஜா விமானத்தில் நடுவானில் கோளாறு: திருச்சியில் டிஜிசிஏ விசாரணை

திருச்சியிலிருந்து 144 பயணிகளுடன் ஷார்ஜாவுக்கு வெள்ளிக்கிழமை புறப்பட்ட ஏர் இந்தியா எக்ஸ்பிரஸ் விமானத்தில் ஏற்பட்ட தொழில்நுட்பக் கோளாறு குறித்து மத்திய அரசின் சிவில் விமானப் போக்குவரத்து இயக்குநரகம் (டிஜிசிஏ) தனது விசாரணையை சனிக்கிழமை தொடங்கியது.

விசாரணைக்காக அந்த விமானம் திருச்சி பன்னாட்டு விமான நிலையத்திலேயே நிறுத்தப்பட்டுள்ளது.

திருச்சியிலிருந்து ஷார்ஜாவுக்கு 144 பயணிகளுடன் வெள்ளிக் கிழமை மாலை புறப்பட்ட ஏர் இந்தியா எக்ஸ்பிரஸ் விமானத்தின் (ஏஎக்ஸ்பி 613)சக்கரங்கள் ஹைட்ராலிக் கோளாறு காரணமாக உள்ளே இழுக்கப்படாததால் 2.35 மணிநேரத்துக்கும் மேலாக நடுவானிலேயே வட்டமடித்தது. பின்னர், பாதுகாப்பாக திருச்சியிலேயே தரையிறக்கப்பட்டது. இதனால் பயணிகள், விமானப் பணியாளர்கள் என 150 பேரும் தப்பினர்.

இச்சம்பவம் குறித்து முழு விசாரணை நடத்த மத்திய விமானப் போக்குவரத்துத்துறை அமைச்சர் ராம் மோகன் நாயுடு உத்தரவிட்டுள்ளார். இதுதொடர்பாக அவர் வெளியிட்டுள்ள அறிக்கையில் தொழில்நுட்பக் கோளாறால் நடுவானிலேயே வட்டமடித்த விமானம் திருச்சி விமான நிலையத்தில பாதுகாப்பாகத் தரையிறங்கியதில் நிம்மதி. விமானப் பயணிகளின் பாதுகாப்பே எப்போதும் எங்களது முதன்மை நோக்கமாக உள்ளது என்றார்.

இதையடுத்து அமைச்சரின் உத்தரவின்படி, திருச்சி விமான நிலையத்துக்கு சென்னையிலிருந்து சனிக்கிழமை காலை வந்த டிஜி சிஏ தொழில்நுட்பக் குழுவினர் விமான நிலைய அதிகாரிகளிடம் சம்பவம் குறித்து முழுமையாகக் கேட்டறிந்து பதில்களைப் பதிவு செய்து கொண்டனர். தொடர்ந்து விமான நிலையத்தில் தொழில்நுட்பக் கோளாறு ஆய்வு செய்தனர்.