கோவையில் கொட்டித் தீர்த்த கனமழை

கோவையில் ஞாயிற்றுக்கிழமை கொட்டித் தீர்த்த கனமழையால் மாநகரில் வீடுகள், கடைகளுக்குள் தண்ணீர் புகுந்தது.

சிவானந்தா காலனியில் ரயில்வே பாலத்தின் கீழ்ப்பகுதியில் தண்ணீரில் சிக்கிய தனியார் பேருந்தில் இருந்து பயணிகள் மீட்கப்பட்டனர்.

கோவை மாவட்டத்தில் பல்வேறு பகுதிகளில் இடைவெளி விட்டு கனமழை பெய்து வருகிறது. இந்நிலையில், வளிமண்டல கீழடுக்கு சுழற்சி காரணமாக கோவையில் கனமழை பெய்ய வாய்ப்புள்ளது என்று வானிலை ஆய்வு மையம் தெரிவித்திருந்தது.

அதன்படி, கோவையில் கவுண்டம்பாளையம், காந்திபுரம், கணபதி, சரவணம்பட்டி, ராமநாதபுரம், வேலாண்டிபாளையம், வடவள்ளி, ஆனைகட்டி, வடகோவை, மருதமலை, பீளமேடு, ஒண்டிப்புதூர், மசக்காளிபாளையம் பகுதிகளில் சனிக்கிழமை இரவு இடி, மின்னலுடன் கனமழை பெய்தது.

இதையடுத்து ஞாயிற்றுக்கிழமை காலை மாநகரப் பகுதிகளில் மிதமான மழை காணப்பட்டது. பிற்பகலில் தொடர்ந்து கனமழை பெய்தது. மாலை வரை நீடித்த மழையால் அவிநாசி சாலை மேம்பாலத்தின் கீழ்ப்பகுதியில் தண்ணீர் குளம்போல தேங்கியது. அதேபோல, அவிநாசி சாலை ரயில்வே மேம்பாலத்தின் கீழ் ரயில் பாதையில் தண்ணீர் சூழ்ந்தது. அரசு மருத்துவமனை அருகே லங்கா கார்னர், கோவை ரயில் நிலையம் சாலை, குனியமுத்தூர், கரும்புக்கடை, ஆத்துப்பாலம் உள்ளிட்ட தாழ்வான பகுதிகளில் தண்ணீர் தேங்கியதால், அவ்வழியாக வாகனங்கள் இயங்குவதில் சிரமம் ஏற்பட்டது.