சமூகத்துக்கு சேவையாற்ற இளம் மருத்துவர்கள் முன்வர வேண்டும்

குறைந்த கட்டணத்தில் அரசு மருத்துவக் கல்லூரிகளில் பயின்று மருத்துவர்களாக உருவெடுப்பவர்கள், இந்த சமூகத்துக்கு பிரதிபலனாக சேவையாற்ற வேண்டும் என்று சண்டிகர் முதுநிலை மருத்துவக் கல்வி மற்றும் ஆராய்ச்சி நிறுவன இயக்குநர் விவேக் லால் வலியுறுத்தினார்.

தமிழ்நாடு டாக்டர் எம்.ஜி.ஆர் மருத்துவப் பல்கலைக்கழகத்தின் 37-ஆவது பட்டமளிப்பு விழா, கிண்டியில் அமைந்துள்ள பல்கலைக்கழக வளாகத்தில் வியாழக்கிழமை (அக்.24) நடைபெற்றது. மாநில ஆளுநரும், வேந்தருமான ஆர்.என்.ரவி பட்டங்களை வழங்கினார்.

நிகழாண்டில் 35,793 மாணவர்கள் பட்டப் படிப்புகளை முடித்துள்ளனர். அவர்களில் 67 சதவீதம் பேர் பெண்களாவர். மாணவர்களில் 121 பேருக்கு விழா அரங்கில் நேரடியாக பட்டங்கள் வழங்கப்பட்டன.

இதைத் தவிர சிறப்பிடம் பெற்ற 142 பேருக்கு ஆளுநர் ஆர்.என்.ரவி, பதக்கங்கள், சான்றிதழ்கள் வழங்கி கௌரவித்தார். அதில் 57 தங்கப் பதக்கங்கள், 18 வெள்ளி பதக்கங்கள், 27 அறக்கட்டளை சான்றிதழ்கள், 40 பல்கலைக்கழகப் பதக்கம் ஆகியவை அடங்கும்.