மழை வெள்ளத்தால் தத்தளிக்கும் மதுரை!

கடந்த சில தினங்களாக தொடர்ந்து பலத்த மழை பெய்து வருவதால், மதுரை மாநகரில் உள்ள பெரும்பாலான கண்மாய்கள் நிரம்பி குடியிருப்புகளுக்குள் தண்ணீர் புகுந்தது. இதனால் பொதுமக்களின் இயல்பு வாழ்க்கை பாதிக்கப்பட்டது.

தமிழகத்தில் வடகிழக்குப் பருவமழை கடந்த 16-ஆம் தேதி தொடங்கிய நிலையில், மதுரையில் ஓரிரு நாள்கள் இடைவெளியில் பலத்த மழை பெய்து வருகிறது. இந்த நிலையில், வெள்ளிக்கிழமை மாலை முதல் இரவு வரை மதுரையில் அதி பலத்த மழை பெய்தது. இதனால், வரத்து கால்வாய்களில் நீர்வரத்து அதிகரித்து ஆத்தி குளம், கல்குளம், நாராயணபுரம் ஆகிய கண்மாய்கள் நிரம்பி கரைகளில் உடைப்புகள் ஏற்பட்டன.

இதனால் செல்லூர், கூடல்புதூர், ஜெ.ஜெ.நகர், வைகைநகர், அய்யர்பங்களா, ஆத்திகுளம், நரிமேடு, கோசாகுளம், சர்வேயர்காலனி, பந்தல்குடி, கோ. புதூர், லூர்துநகர், ஆனையூர், பொதும்பு, குலமங்கலம், விஸ்வநாதபுரம், மகாத்மா காந்திநகர், முல்லைநகர் உள்பட 40-க்கும் மேற்பட்ட பகுதிகளில் முழங்கால் அளவுக்கு தண்ணீர் தேங்கியது. மேலும், தாழ்வான பகுதிகளில் வீடுகளுக்குள் மழைநீருடன், கழிவு நீரும் புகுந்தது.