இணையவழியில் "என்டிஏ" தேர்வுகள்: உயர்நிலைக் குழு பரிந்துரைக்க முடிவு

தேசிய தேர்வு முகமையால் நடத்தப்படும் 'நீட்' (மருத்துவப் படிப்புக்கான தகுதி காண் நுழைவுத் தேர்வு) உள்ளிட்ட போட்டித் தேர்வுகளை இணையவழியில் நடத்த வேண்டுமென மத்திய அரசுக்கு பரிந்துரைக்க உயர்நிலைக் குழு முடிவு செய்துள்ளதாக அரசு வட்டாரங்கள் தெரிவித்தன.

மருத்துவப் படிப்பு மாணவர் சேர்க்கைக்கான 'நீட்', பொது பல்கலைக்கழக நுழைவுத் தேர்வு (க்யூட்), தேசிய தகுதித் தேர்வு (நெட்) உள்ளிட்ட பல்வேறு தேர்வுகளை தேசிய தேர்வுகள் முகமை (என்டிஏ) நடத்துகிறது.

கடந்த மே மாதம் 5-ஆம் தேதி நடத்தப்பட்ட இளநிலை 'நீட்' தேர்வின்போது, பிகாரின் பாட்னா, ஜார்க்கண்டின் ஹசாரிபாக் தேர்வு மையங்களில் வினாத்தாள் கசிந்த விவகாரம் மிகப் பெரிய சர்ச்சையானது. இதைத் தொடர்ந்து, கடந்த ஜூன் மாதம் நடந்த தேசிய தகுதித் தேர்விலும் (நெட்) முறைகேடு நடந்திருப்பதாகக் கூறி, பல லட்சம் பேர் எழுதிய அத்தேர்வை மத்திய அரசு ரத்து செய்தது.