ஹிந்தி பட வில்லன்போல் பிரதமர் பேசக் கூடாது: காங்கிரஸ் விமர்சனம்

மகாராஷ்டிரம், ஜார்க்கண்ட் பேரவைத் தேர்தல் களில் பாஜக தோல்வியைச் சந்திக்கும் என்பதை அறிந்த பிரதமர் நரேந்திர மோடி, ஹிந்தி திரைப்படங்களில் வரும் வில்லன் கதாபாத்திர பாணியில் தரம்தாழ்ந்து பேசக்கூடாது என காங்கிரஸ் விமர்சித்துள்ளது.

தேர்தல் பிரசாரத்தில் எதிர்க்கட்சியான இந்தியா கட்சிகளின் கூட்டணியை 'ஊடுருவல்காரர்களை ஆதரிப்பவர்கள்' என்றும் 'நாட்டு மக்களின் மகள்களின் தாலியையும், வாழ்வாதாரத்தையும் பறிப்பவர்கள்' என்றும் பிரதமர் விமர்சித்திருப்பதாக கூறி, காங்கிரஸ் இந்த பதிலடி அளித்துள்ளது.

இதுதொடர்பாக காங்கிரஸின் ஊடகப் பிரிவுத் தலைவர் பவண் கேரா 'எக்ஸ்' வலைதளத்தில் வெளியிட்ட பதிவில், 'தேர்தல் பிரசாரங்களில் பிரதமர் மோடி பயன்படுத்தும் வார்த்தைகளின் கண்ணியம் மிக வேகமாக குறைந்து வருகிறது.

கடந்த மக்களவைத் தேர்தலில் தோல்வி பயத்தில் சமூகங்களுக்கு இடையே வெறுப்பைப் பரப்பி, பிளவை ஏற்படுத்த முயன்ற பிரதமர் மோடி, தேர்தல் முடிவில் போதிய இடங்கள் கிடைக்காமல் கூட்டணி ஆட்சி நடத்துகிறார்.