எளிய மனிதர்களும் இதயம் கவரலாம்

எத்தனையோ எளிய மனிதர்களை தினசரி கடந்து செல்கிறோம். மிகப் பெரிய கூட்டுக் குடும்பத்தையே, எழுதப் படிக்கத் தெரியாத சாமானியப் பெண்கள் திறம்பட வழி நடத்தியிருப்பதை நாம் கண்டிருக்கிறோம். வாசிப்பு இல்லாது போனாலும் அவர்கள் மனிதர்களைப் படித்திருக்கிறார்கள்.

- முனைவர் பவித்ரா நந்தகுமார்

சமீபத்தில் ஒரு இலக்கியக் கூட்டத்தில் பங்கு கொள்ள நேர்ந்தது. பல ஆழமான கருத்துக்களை முன்வைத்த ஒரு எழுத்தாளர் இறுதியாகத் தன்னுடைய கருத்து ஒன்றையும் பதிவு செய்தார்.

"வாசிப்பவர்கள் தான் உயர்வானவர்கள், மற்றவர்கள் எல்லாம் தாழ்வானவர்கள்" என்னும் கருத்தைப் பிரதிபலிப்பது போல் நிறைவு செய்தார். அந்த வார்த்தைகள் அந்தக் கூட்டத்தில் கலந்து கொண்ட சகலரையும் அதிர்ச்சிக்குள்ளாக்கியது.

மனிதர்கள் பலவிதம். அவரவர் வாழும் சூழ்நிலைகள் எண்ணற்ற வேறுபாடுகளுக்கு உட்பட்டவை. ஒருவருக்குச் சுலபமாகக் கிடைக்கும் ஒன்று, மற்றொருவருக்கு மிகக் கடினமான முயற்சிக்குப் பிறகே கிடைக்கிறது. இது அவரவரின் செயல்பாடுகளில் பிரதிபலிக்கும் இல்லையா?! வாசிப்பு ஒரு மனிதனை மேலான நிலைக்கு அழைத்துச் செல்லும். மறுப்பதற்கில்லை. ஆனால் வாசிக்காத எளிய மனிதர்களை இழிவுபடுத்துவது போல் அவர் பேசியது பலரைக் காயப்படுத்தியது.

எளிய மனிதர்கள் சாதாரணமானவர்கள் அல்ல. மிக வலிமையானவர்களாகக் கருதப்படுபவர்களுக்குக் கூடப் போகிற போக்கில் வாழ்க்கைப் பாடம் சொல்லிக் கொடுத்து விட்டுச் செல்பவர்கள் அவர்கள். அவரவர்க்கு அவர் சுயப் பொறுப்பும் கௌரவமும் முக்கியம். பல நேரங்களில் மனிதர்களைச் சிலர் தப்புக் கணக்குப் போட்டு விடுகின்றனர்.