கொல்கத்தா பெண் மருத்துவர் பாலியல் கொலை வழக்கு: வேறு மாநிலத்துக்கு மாற்ற உச்சநீதிமன்றம் மறுப்பு

கொல்கத்தா பெண் மருத்துவர் பாலியல் கொலை வழக்கு விசாரணையை மேற்கு வங்க மாநிலத்துக்கு வெளியே மாற்ற உச்சநீதிமன்றம் வியாழக்கிழமை மறுப்பு தெரிவித்தது.

மேற்கு வங்க மாநிலம் கொல்கத்தாவில் உள்ள அரசு மருத்துவக் கல்லூரி மருத்துவமனையில் முதுநிலை பெண் பயிற்சி மருத்துவர் கடந்த ஆகஸ்ட் மாதம் பாலியல் கொலை செய்யப்பட்டார். அவரை பாலியல் வன்கொடுமை செய்து கொன்றதாக காவல் துறைக்கு உதவும் தன்னார்வலராக பணியாற்றிய சஞ்சய் ராய், கொலை தொடர்பான ஆதாரங்களை சேதப்படுத்தி வழக்கு பதிய தாமதித்ததாக தாலா காவல் நிலைய பொறுப்பு அதிகாரி அபிஜீத் மோண்டல், அந்த மருத்துவக் கல்லூரி மருத்துவமனையின் முன்னாள் முதல்வர் சந்தீப் கோஷ் ஆகிய மூவர் கைது செய்யப்பட்டனர். இந்த வழக்கை சிபிஐ விசாரித்து வருகிறது. வழக்கின் பிரதான விசாரணை கொல்கத்தாவில் உள்ள விசாரணை நீதிமன்றத்தில் நடைபெற்று வருகிறது. உச்சநீதிமன்றமும் தாமாக முன்வந்து இந்த வழக்கை விசாரித்து வருகிறது.