பாலஸ்தீனர்களை நாடுகடத்தும் சட்டம்: இஸ்ரேல் நாடாளுமன்றம் ஒப்புதல்

தங்கள் பகுதிகளில் வசிக்கும் 'பயங்கரவாதிகளின்' குடும்ப உறுப்பினர்களை நாடு கடத்த வகை செய்யும் சட்ட மசோதாவுக்கு இஸ்ரேல் நாடாளுமன்றம் வியாழக்கிழமை ஒப்புதல் வழங்கியது.

போராளிக் குழுக்களுக்கு ஆதரவு தெரிவித்தால்கூட அவர்களை நாடு கடத்த அதிகாரம் வழங்கும் இந்த சட்ட மசோதா, பிரதமர் பெஞ்சமின் நெதன்யாகுவின் லிக்குட் கட்சி மற்றும் அதன் தீவிர வலதுசாரி கூட்டணிக் கட்சிகளால் கொண்டுவரப்பட்டது.

அந்த மசோதாவுக்கு ஆதரவாக 61 வாக்குகளும் மசோதாவை எதிர்த்து 41 வாக்குகளும் பதிவாகின. அதையடுத்து அந்த மசோதா நிறைவேற்றப்பட்டது.

எனினும், இந்தச் சட்டத்துக்கு எதிராக நீதிமன்றங்களில் வழக்குத் தொடரப்படும் என்று எதிர்பார்க்கப்படுகிறது.

இது இஸ்ரேலிய அரசியல் சாசனத்துக்கு எதிரான சட்டம் என்பதால் நீதிமன்றம் அதை ரத்து செய்வதற்கான வாய்ப்புள்ளதாக நிபுணர்கள் தெரிவித்துள்ளனர்.