உச்சநீதிமன்ற புதிய தலைமை நீதிபதி சஞ்சீவ் கன்னா இன்று பதவியேற்பு

உச்சநீதிமன்றத்தின் 51-ஆவது தலைமை நீதிபதியாக சஞ்சீவ் கன்னா திங்கள்கிழமை (நவ. 11) பதவியேற்கிறார்.

தேர்தல் நிதிப் பத்திரத் திட்டம், சட்டப்பிரிவு 370 உள்ளிட்ட முக்கியத்துவம் வாய்ந்த வழக்குகளில் தீர்ப்பளித்த அமர்வில் இவர் இடம் பெற்றிருந்தார். உச்சநீதிமன்றத்தின் 50-ஆவது தலைமை நீதிபதியாக கடந்த 2022-ஆம் ஆண்டு நவம்பர் 9-ஆம் தேதி முதல் பதவிவகித்து வந்த டி.ஒய்.சந்திரசூட் ஞாயிற்றுக்கிழமை ஓய்வு பெற்றார். முன்னதாக அடுத்த உச்ச நீதிமன்றத் தலைமை நீதிபதி நியமனத்துக்கான பரிந்துரையை அனுப்புமாறு டி.ஒய்.சந்திரசூட்டிடம் மத்திய சட்டத் துறை அமைச்சகம் கேட்டுக்கொண்டது. அதன்பேரில், தனக்கு அடுத்த மூத்த நீதிபதியான சஞ்சீவ் கன்னாவின் பெயரை பரிந்துரைத்து டி.ஒய்.சந்திரசூட் கடிதம் அனுப்பினார்.