தகவல் உரிமைச் சட்ட மேல்முறையீட்டு விசாரணையில் மாற்று அதிகாரிகள் கூடாது

அரசுக்கு மாநில தகவல் ஆணையம் கடிதம்

தகவல் பெறும் உரிமைச் சட்ட மேல்முறையீட்டு விசாரணையில் சம்பந்தப்பட்ட பொதுத் தகவல் அலுவலர்கள் மட்டுமே ஆஜராக வேண்டுமென மாநிலத் தகவல் ஆணையம் அறிவுறுத்தியுள்ளது.

இதுகுறித்து மாநில தகவல் ஆணையர் எம்.செல்வராஜ், தமிழ்நாடு அரசின் மனிதவள மேலாண்மைத் துறைக்கு அனுப்பிய கடிதம்:

தகவல் பெறும் உரிமைச் சட்டத்தின் கீழ், மனுதாரர்கள் மேல்முறையீடு செய்யலாம். இந்த மேல்முறையீட்டு விசாரணையின் போது, பொதுத் தகவல் அலுவலர் நேரில் ஆஜராவது கட்டாயம். ஆனால், விசாரணை நடைபெறும் நாளன்று பொதுத் தகவல் அலுவலர் ஆஜராகாமல், விடுப்பு எடுத்து விடுகிறார். அவருக்குப் பதிலாக வேறொரு அலுவலர் மேல்முறையீட்டு விசாரணையில் ஆஜராவதால், அவருக்கு வழக்கு குறித்த விவரம் ஏதும் தெரிவதில்லை.

அவமதிக்கும் செயல்: தகவல் பெறும் உரிமைச் சட்ட மேல்முறையீட்டு விதி 8, உட்பிரிவு 3-ன்படி, வெள்ளம், கொள்ளை நோய்த் தடுப்பு, சட்டம்-ஒழுங்கு கையாள்தல் போன்ற நிகழ்வுகளின்போது பொதுத்தகவல் அலுவலர் ஆஜராகாமல் விலக்குப் பெறலாம். ஆனால், வழக்கமான நாட்களில் கூட விசாரணைக்கு வராமல் கீழ்நிலை அலுவலரை அனுப்பி வைப்பது தமிழ்நாடு மாநில தகவல் ஆணையத்தை அவமதிக்கும் செயல். எனவே, விசாரணைக்கு பொதுத் தகவல் அலுவலர்தான் நேரில் ஆஜராக வேண்டும். இதனை அனைத்து பொது அதிகார அமைப்புகளுக்கும் அறிவுறுத்த வேண்டும்.