மணிப்பூரில் எஞ்சிய 6 பகுதிகளில் ஆயுதப் படைகள் சிறப்புச் சட்டம் அமல்

மணிப்பூரில் வன்முறையால் பாதிக்கப்பட்ட ஜிரிபாம் மாவட்ட காவல்நிலையம் உள்பட 6 காவல் நிலைய பகுதிகளில் ஆயுதப் படைகள் (சிறப்பு அதிகாரங்கள்) சட்டத்தை மத்திய அரசு மீண்டும் வியாழக்கிழமை அமல்படுத்தியது.

முன்னதாக கடந்த அக்டோபர் 1-ஆம் தேதி மாநிலம் முழுவதும் ஆயுதப் படைகள் சிறப்புச் சட்டத்தை மாநில அரசு அமல்படுத்தியது. இருப்பினும், இந்த குறிப்பிட்ட 6 காவல் நிலைய பகுதிகள் உள்பட 19 பகுதிகளுக்கு மட்டும் விலக்கு அளிக்கப்பட்டிருந்த நிலையில், தற்போது இந்த அறிவிப்பு வெளியாகியுள்ளது.

அண்மையில், ஜிரிபாம் மாவட்டத்தில் பாதுகாப்புப் படையினருடன் நடந்த துப்பாக்கிச் சண்டையில் 11 தீவிரவாதிகள் சுட்டுக் கொல்லப்பட்டனர். இந்த மோதலில் சிஆர்பிஎஃப் வீரர்கள் இருவர் காயமடைந்தனர்.