மருந்தின் பக்க விளைவுகளை நோயாளிகளுக்கு மருத்துவர்கள் தெரிவிக்க கோரிய மனு தள்ளுபடி

நோயாளிகளுக்கு பரிந்துரைக்கும் மருந்தால் ஏற்படும் பக்க விளைவுகள் குறித்த விவரங்களை மருந்துச் சீட்டில் மருத்துவர்கள் குறிப்பிடுவதைக் கட்டாயமாக்கக் கோரி தாக்கல் செய்யப்பட்ட மனுவை உச்சநீதிமன்றம் வியாழக்கிழமை தள்ளுபடி செய்தது.

இதே கோரிக்கையை வலியுறுத்தி தில்லியைச் சேர்ந்த ஜாகப் வடக்கஞ்சேரி என்பவர் தில்லி உயர்நீதிமன்றத்தில் அண்மையில் மனு தாக்கல் செய்திருந்தார்.

இந்த மனுவை கடந்த மே 15-ஆம் தேதி விசாரித்த உயர்நீதிமன்றம், 'மருந்துகளின் அட்டைகளில் உற்பத்தி நிறுவனங்கள் தரப்பில் குறிப்பிடப்பட்டுள்ள பக்க விளைவுகள் உள்ளிட்ட விவரங்கள் குறித்து எந்தவித ஆட்சேபத்தையும் மனுதாரர் எழுப்பவில்லை. மேலும், இது தொடர்பான அறிவுறுத்தல்கள் மற்றும் சட்டங்களை வகுக்கும் அதிகாரம் சட்டப்பேரவையிடம் உள்ளது. எனவே, நீதிமன்றம் தலையிட தேவை இல்லை' என்று குறிப்பிட்டு மனுவை தள்ளுபடி செய்து உத்தரவிட்டது.