பயணங்கள் முடிவதில்லை...

இந்த ஆண்டு தீபாவளி கூட்டத்தை சமாளிக்க, தனியார் பேருந்துகளை கிலோ மீட்டருக்கு டீசல் உட்பட ரூ.51.45க்கு அரசு வாடகைக்கு எடுத்துள்ளதாக தகவல். இதற்கு காரணம் 8,000 பேருந்துகளை வாங்கப் போவதாக அறிவித்த அரசால் 2,000 பேருந்துகள் கூட வாங்க முடியவில்லை என்பதுதான்.

- டி-எஸ்-ஆர். வேங்கடராமன்

நம்முடைய எட்டாம் வகுப்பு சரித்திர புத்தகத்தில் பண்டைய மன்னர்கள் அசோகர், அக்பர், ராஜராஜ சோழன், ஏன் சுமார் 325 ஆண்டுகளுக்கு உட்பட்ட ராணி மங்கம்மாள் உட்பட யாரைப் பற்றி படித்தாலும் அவர்கள் குளம் வெட்டி னார்கள், கோயில் கட்டினார்கள், சாலைகள் அமைத்தார்கள், மரம் நட்டார்கள் என்று வரலாறு சொல்லும். ராணி மங்கம்மாள் அமைத்த சாலை இன்றும் அவர் பெயரால் மதுரையிலிருந்து தென்காசி வரை வருகிறது.

பயணம் என்பதுவாழ்வியலின் ஒரு அங்கம். மனித குலத்தின் மகத்தான வளர்ச்சி அவனுடைய முதல் கண்டுபிடிப்பான சக்கரத்தில் தொடங்குகிறது. சக்கரம் அவனது வாழ்வையே புரட்டிப் போட்டது. அது வரை காலால் நடந்து கொண்டிருந்த மனிதன், மாட்டு வண்டி, குதிரை இழுக்கும் ஜட்கா வண்டி, மோட்டார் வண்டி, ரயில் வண்டி, ஆகாய விமானம் என பரிணாம வளர்ச்சியடைந்து, இன்று சக்கரமேயில்லாமல் அண்டத்தைச் சுற்றும் ராக்கெட் வரை அவன் பயணங்கள் முடிவில்லாமல் தொடர்ந்து கொண்டேயிருக்கிறது.

'ஏழு ஆண்டுகளுக்குள் காசிக்குச் சென்று திரும்பாவிட்டால், காரியம் பண்ணி விடுங்கள்' என்ற காலம் போய், காலையில் கிளம்பி, கங்கையில் குளித்து, மறைந்த பெற்றோர்களுக்கு காரியங்கள் செய்துவிட்டு, மாலையில் வீடு திரும்பும் அளவிற்கு பயணங்கள் எளிதாகிவிட்டன.

உள்ளூர் தவளைகளாக இருந்தவர்கள் இன்று படிப்புக்காகவும், வேலைக்காகவும், வியாபாரத்திற்காகவும் வெளியூர் சென்று வசித்தாலும், ஆண்டுக்கொரு முறை குல சாமியை கும்பிடவும், தைப்பொங்கலுக்கும், தீபாவளிக்கும் ஊருக்குச் சென்று, உறவினருடன் கூடி மகிழ்வது இந்திய கலாசாரத்தின் அங்கம். இந்தப் பயணங்களுக்கு ஜாதியும், மொழியும் தடையல்ல.