சிறைக்கும் வேண்டும் சீர்திருத்தம்

தண்டனை பெற்று சிறைக்கு வரும் கைதிகள், அடிமைகள் அல்ல, நாட்டின் உடமைகள். குற்றம் பழுதடைந்த, நோய்வாய்ப்பட்ட மனதின் வெளிப்பாடு. 'நோயுற்ற மனதை குணப்படுத்தும் மருத்துவமனைதான் சிறை என்பதால் அதற்கேற்ற சூழல் உருவாக்கப்பட வேண்டும்' என்றார் அண்ணல் காந்தி.

- கட்டுரையாளர்: முன்னாள் காவல்துறை தலைவர்

தி எண் 6342 - அறிஞர் அண்ணா சென்னை மத்திய சிறையில் இருந்தபோது அவருக்குக் கொடுக்கப்பட்ட அடையாளம். அரசியல் சாசன மொழிப் பிரிவின் 17-ஆவது பிரிவை பொது இடத்தில் கொளுத்தும் அறப்போரில் 1963 டிசம்பரில் ஆறு மாதம் தண்டனை பெற்று சென்னை மத்திய சிறையில் இருந்தபோது பெற்ற அனுபவங்களை அன்றாடம் டைரியில் பதிவு செய்துள்ளார்.

சிறை வாசம் எவ்வாறு தனி மனித சுதந்திரத்தைப் பறிக்கிறது, எவ்வாறு சிறைப் பணியாளர்கள் நடந்து கொள்கிறார்கள், விதிமுறைகள், நடக்கும் முறைகேடுகள், சீர்திருத்தம் செய்ய வேண்டியதன் கட்டாயம் போன்றவற்றைப் பற்றி எழுதியுள்ளார்.

பொதுவாழ்க்கையில் ஈடுபட்டு, சிறை பட நேரிடுபவர்களுக்கெல்லாம், பிற கைதிகளை 'நல்லவர்களாக்கும்' முறை மேம்பட வேண்டும் என்ற எண்ணம் ஏற்படுகிறது! சிறையில் பல விதமான குற்றங்களுக்காக அடைக்கப்பட்டிருப்பவர்களிடம் பழக வேண்டிய நிலை இருப்பதும், அந்த நிலை காரணமாக, அவர்களுடன் பேசி அவர்கள் கதையை தெரிந்து கொள்ளும் வாய்ப்பும், அவர்கள் கூறுவது கேட்டு மனம் இளகுவதும் இயற்கையாகவே ஏற்படுகிறது. சிறையில் சீர்திருத்தம் வேண்டும் என்பது பற்றி, 'இன்று மற்றவருடன் மெத்த ஆர்வத்துடன் பேசத் துவங்கினோம்' என்று 7-3-64 நாளில் தனது டைரியில் குறிப்பிட்டிருக்கிறார்.

அறுபது வருடங்கள் கடந்தும் சிறை சீர்திருத்தம் என்பது கானல் நீராகவே தொடர்கிறது! சமீபத்தில் சென்னை உயர் நீதிமன்றம் ஆயுள் கைதிகளை துறை உயர் அதிகாரிகள் வீட்டில் வேலை செய்வதற்குப் பணித்தது குறித்து கண்டனம் தெரிவித்து, விசாரணை மேற்கொள்ள ஆணையிட்டுள்ளது.

சிறையில் விசாரணைக் கைதிகள் தனியாகவும் தண்டனை பெற்ற கைதிகள் வேறு இடத்திலும் வைக்கப்பட்டிருப்பார்கள். புழல் சிறையில் இரண்டு பிரிவினருக்கும் தனி வளாகம் உள்ளது. சிறை விதிகள்படி அவர்களது பராமரிப்பு வேறுபடும். தண்டனை பெற்றவரின் மனநிலை வித்தியாசப்படும். மன உளைச்சலும் கடுப்பும் அதிகமாக இருக்கும். மற்ற கைதிகளுக்கு பாதிப்பு ஏற்பட்டுவிடக் கூடாது என்பதற்காக இந்த தனிமைப்படுத்தல். இதை கவனமாக கண்காணிக்க வேண்டும்.