ஏழு குழந்தைகளை மீட்டு இரட்டைக் குழந்தைகளை இழந்த யாகூப்!

ஜான்சி மருத்துவமனை தீ விபத்தில் சோகம்

ஜான்சி, நவ. 19: உத்தர பிரதேசத்தின் ஜான்சி அரசு மருத்துவமனையில் கடந்த வாரம் ஏற்பட்ட தீ விபத்தில் ஏழு பச்சிளம் குழந்தைகளை மீட்ட இளைஞர் யாகூப் மன்சூர் (27), அந்தச் சம்பவத்தில் தனது இரட்டையர் பிஞ்சுக் குழந்தைகளைப் பறிகொடுத்த சம்பவம் மனதை உருக்கியுள்ளது.

உத்தர பிரதேசத்தின் ஜான்சியில் உள்ள மகாராணி லக்ஷ்மி பாய் அரசு மருத்துவக் கல்லூரி மருத்துவமனையின் பச்சிளம் குழந்தைகள் தீவிர சிகிச்சைப் பிரிவில் கடந்த 15-ஆம் தேதி இரவு தீ விபத்து ஏற்பட்டது. அந்த நேரத்தில் அங்கு சேர்க்கப்பட்டிருந்த 49 குழந்தைகளில் 39 குழந்தைகள் மீட்கப்பட்டன. 10 குழந்தைகள் தீயினால் ஏற்பட்ட புகையில் மூச்சுத் திணரலுக்கு உள்ளானதாலும், தீக்காயங்களாலும் உயிரிழந்தன.

மீட்கப்பட்ட குழந்தைகளில் தீவிர சிகிச்சைப் பிரிவில் சேர்க்கப்பட்ட ஒரு குழந்தை சனிக்கிழமையும் மற்றொரு குழந்தை ஞாயிற்றுக்கிழமையும் இறந்ததால், உயிரிழப்பு எண்ணிக்கை 12-ஆக உயர்ந்துள்ளது. மீட்கப்பட்ட 37 குழந்தைகளுக்கு தொடர்ந்து சிகிச்சை அளிக்கப்பட்டு வருகின்றது.