ஜார்க்கண்ட் முதல்வராக ஹேமந்த் சோரன் பதவியேற்பு

ஜார்க்கண்ட் மாநிலத்தின் 14-ஆவது முதல்வராக ஜார்க்கண்ட் முக்தி மோர்ச்சா (ஜேஎம்எம்) தலைவர் ஹேமந்த் சோரன் வியாழக்கிழமை பதவியேற்றார்.

தலைநகர் ராஞ்சியில் பிரம்மாண்டமாக நடைபெற்ற பதவியேற்பு விழாவில், ஹேமந்த் சோரனுக்கு ஆளுநர் சந்தோஷ் குமார் கங்வார் பதவிப் பிரமாணமும் ரகசிய காப்பு பிரமாணமும் செய்து வைத்தார்.

விழாவில் காங்கிரஸ் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி, மேற்கு வங்க முதல்வரும் திரிணமூல் காங்கிரஸ் தலைவருமான மம்தா பானர்ஜி, தமிழக துணை முதல்வர் உதயநிதி ஸ்டாலின், ஆம் ஆத்மி தேசிய அமைப்பாளர் அரவிந்த் கேஜரிவால், சமாஜவாதி தலைவர் அகிலேஷ் யாதவ், ராஷ்ட்ரீய ஜனதா தளத்தின் தலைவர் தேஜஸ்வி யாதவ் உள்ளிட்ட கூட்டணிக் கட்சிகளின் தலைவர்கள் பங்கேற்றனர்.

81 உறுப்பினர்களைக் கொண்ட ஜார்க்கண்ட் சட்டப்பேரவைக்கு இரு கட்டங்களாக (நவ. 13, 20) தேர்தல் நடைபெற்றது. கடந்த 23-ஆம் தேதி வாக்குகள் எண்ணப்பட்டு முடிவுகள் அறிவிக்கப்பட்டன.

இதில் ஜார்க்கண்ட் முக்தி மோர்ச்சா, காங்கிரஸ், ராஷ்ட்ரீய ஜனதா தளம் (ஆர்ஜேடி), இந்திய கம்யூனிஸ்ட் (மார்க்சிஸ்ட் லெனினிஸ்ட்) விடுதலை ஆகிய கட்சிகள் இடம்பெற்ற 'இண்டி' கூட்டணி 56 இடங்களைக் கைப்பற்றி ஆட்சியைத் தக்கவைத்தது.

ஜார்க்கண்ட் முக்தி மோர்ச்சா முன்னெப்போதும் இல்லாத அளவில் 34 இடங்களில் வென்று, தனிப்பெரும் கட்சியாக உருவெடுத்தது. அதேநேரம், தனிப்பெரும்பான்மை (41) கிடைக்கவில்லை. காங்கிரஸ் 16, ராஷ்ட்ரீய ஜனதா தளம் 4, இந்திய கம்யூனிஸ்ட் (மார்க்சிஸ்ட் லெனினிஸ்ட்) விடுதலை கட்சி 2 இடங்களில் வென்றன.

பாஜக தலைமையிலான தேசிய ஜனநாயக கூட்டணிக்கு 24 இடங்களே கிடைத்தன. பாஜக 21 தொகுதிகளிலும், அனைத்து ஜார்க்கண்ட் மாணவர் சங்கம், ஐக்கிய ஜனதா தளம், லோக் ஜனசக்தி (ராம்விலாஸ்) தலா ஒரு தொகுதியிலும் வெற்றி பெற்றன.