பெண்களின் பாதுகாப்புக்கான பேராயுதம்!

உலக அளவில், நாள்தோறும் சுமார் 140 பெண்கள் தமது கணவர் உள்ளிட்ட குடும்ப உறவுகளால் கொல்லப்படுவதாகவும், இவ்வாறு கடந்த ஆண்டு கொல்லப்பட்ட பெண்களின் எண்ணிக்கை சுமார் 51,100 எனும் அதிர்ச்சி அளிக்கும் தகவலை ஐ.நா. அமைப்பு சமீபத்தில் வெளியிட்டிருக்கிறது.

- இரா.சாந்தகுமார்

நம் நாட்டில், குடும்பத்தில் உள்ளவர்களால் பெண்கள் வன்முறைக்குள்ளாகும்போது, அவர்களின் சட்ட ரீதியிலான போராட்டத்திற்கு உதவும் பேராயுதமாக இருப்பது, குடும்ப வன்முறைச் சட்டம். பாதிக்கப்பட்ட பெண்களுக்கு உரிய நிவாரணம் வழங்கப்படுவதோடு, வன்முறையை நிகழ்த்துபவர்களுக்கு தண்டனை அளிக்கவும் குடும்ப வன்முறைச் சட்டம் 2005-ஆம் ஆண்டு இயற்றப்பட்டது.

தங்கள் மீது இழைக்கப்படும் வன்முறையில் இருந்து விடுபட திருமண பந்தத்திலிருந்து விடுபடுவதுதான் ஒரே தீர்வு என்ற நிலை பெண்களுக்கு ஏற்படும்போது குடும்ப வன்முறைச் சட்டம் மூலமே அது சாத்தியமாகிறது. இச்சட்டம் இயற்றப்பட்டு ஏறக்குறைய இருபது ஆண்டுகள் கடந்து விட்ட நிலையில், கடந்த காலங்களில் மணவிலக்கு கோரி தொடுக்கப்பட்ட வழக்குகளின் தன்மைக்கேற்ப நீதிமன்றங்களால் பிறப்பிக்கப்பட்ட உத்தரவுகளாலும், சட்டப்பேரவைகள் மற்றும் நாடாளுமன்றத்தில் இயற்றப்பட்ட சட்டங்களாலும் அவ்வப்போது இச்சட்டம் வலுப்பெற்று வருகிறது.

கணவன், மனைவிக்கு இடையிலான புரிதலின்மை, ஒருவரை மற்றவர் அனுசரித்து போகாதது, பொருளாதாரப் பிரச்னை, மகப்பேறின்மை, இளம் தம்பதியினரிடையே ஏற்படும் சிறு பிரச்னைகளை ஆரம்ப நிலையிலேயே தீர்த்து வைக்கும் பெற்றோர்கள் இருக்கும் குடும்பங்கள் குறைந்து, பெற்றோர்கள் இல்லாத தனிக் குடும்பங்கள் பெருகி வருவது உள்பட பல்வேறு காரணங்களால் மணவிலக்கு கோரும் வழக்குகளின் எண்ணிக்கை நாளுக்கு நாள் அதிகரித்து வருகிறது.