திருவண்ணாமலையில் மண் சரிவு: மேலும் இருவரின் உடல்கள் மீட்பு

திருவண்ணாமலை மண் சரிவில் சிக்கிய மேலும் இருவரின் உடல்கள் செவ்வாய்க்கிழமை மீட்கப்பட்டன. இந்த சம்பவத்தில் உயிரிழந்த 7 பேரின் உடல்களும் மீட்கப்பட்டுள்ளன.

பலத்த மழையால், திருவண்ணாமலை கிரிவலப் பாதையில் ஞாயிற்றுக்கிழமை (டிச.1) மாலை சுமார் 5 மணிக்கு மகா தீபம் ஏற்றக்கூடிய மலையையொட்டியுள்ள வ.உ.சி. நகர், 11-ஆவது தெருவில் திடீரென மண் சரிவு ஏற்பட்டது. இதில் 10-க்கும் மேற்பட்ட வீடுகள் கடுமையாக பாதிக்கப்பட்டன. மலையின் மேற்பகுதியில் இருந்த 2 வீடுகள் மீது பாறாங்கற்கள் விழுந்து அமுக்கியதால் வீடுகளில் இருந்தவர்களால் தப்பி ஓட முடியவில்லை. இந்த வீடுகளில் 7 பேர் சிக்கிக்கொண்டனர். தேசிய பேரிடர் மீட்புக் குழுவின் உதவி கமாண்டர் ஸ்ரீதர் தலைமையில் 35 பேர், திருவண்ணாமலை மாவட்ட காவல் கமாண்டோ படை, மாநில மீட்புப் படை, மாவட்ட ஆயுதப் படை காவலர்கள், தீயணைப்புத் துறை வீரர்கள் சேர்ந்து மீட்புப் பணியில் ஈடுபட்டனர். இதில் திங்கள்கிழமை மாலை 5 பேர் சடலங்களாக மீட்கப்பட்டனர்.

இந்த நிலையில், செவ்வாய்க்கிழமை பிற்பகல் ஒருவர் சடலமாக மீட்கப்பட்டார். இறுதியாக, ரம்யா என்ற சிறுமியைத் தேடும் பணி நடைபெற்றது. செவ்வாய்க்கிழமை மாலை சுமார் 5.15 மணிக்கு அவர் சடலமாக மீட்கப்பட்டார். தொடர்ந்து, 48 மணி நேரத்தைக் கடந்து நடைபெற்ற மீட்புப் பணியின் இறுதியில் 7 பேரும் சடலங்களாக மீட்கப்பட்டனர்.