மக்களவைத் தலைவருடன் ராகுல் சந்திப்பு

மக்களவைத் தலைவர் ஓம் பிர்லாவை புதன்கிழமை சந்தித்த மக்களவை எதிர்க்கட்சித் தலைவர் ராகுல் காந்தி, தனக்கு எதிராக பாஜக எம்.பி.க்கள் தெரிவித்த அவதூறு கருத்துகளை அவைக் குறிப்பில் இருந்து நீக்க வேண்டும்; அவை சுமுகமாக செயல்படுவதை உறுதி செய்ய வேண்டும் என்று கோரிக்கை விடுத்தார்.

மக்களவையில் கடந்த வியாழக்கிழமை (டிச.5) பேசிய பாஜக எம்.பி. நிஷிகாந்த் துபே, ‘திட்டமிட்ட குற்றங்கள் மற்றும் ஊழலை வெளிப்படுத்தும் குற்றப் புலனாய்வு ஊடக தளம் (ஓசிசிஆர்பி) வெளியிடும் அறிக்கைகளை சுட்டிக்காட்டி நாடாளுமன்றத்தை முடக்க காங்கிரஸ் தலைமையிலான எதிர்க்கட்சிகள் முயற்சிக்கின்றன. இந்த ஊடக தளத்துக்கும் அமெரிக்க கோடீஸ்வர முதலீட்டாளர் ஜார்ஜ் சோரஸுக்கும் தொடர்பு உள்ளது.

பிரதமர் நரேந்திர மோடி தலைமையில் சாத்தியமாகிவரும் இந்தியாவின் வெற்றிப் பயணத்தை சீர்குலைக்க அமெரிக்க கோடீஸ்வர முதலீட்டாளரும் ஓசிசிஆர்பி தளமும் காங்கிரஸும் கூட்டாக முயற்சிகின்றன' என்று குற்றஞ்சாட்டினார். மேலும், இந்த விவகாரத்தில் ராகுல் காந்தி மற்றும் பிரியங்கா காந்திக்கு சில கேள்விகளையும் எழுப்பினார்.