மகாராஷ்டிரம்: 39 அமைச்சர்கள் பதவியேற்பு

மகாராஷ்டிர அமைச்சரவை விரிவாக்கம் செய்யப்பட்டு 39 அமைச்சர்கள் ஞாயிற்றுக்கிழமை பதவியேற்றனர்.

அவர்களில் 33 பேர் கேபினட் அமைச்சர்களாகவும், 6 பேர் இணையமைச்சர்களாகவும் பதவியேற்றனர்.

கடந்த நவம்பரில் 288 தொகுதிகளுக்கான மகாராஷ்டிர சட்டப்பேரவைத் தேர்தல் நடைபெற்றது. இதில் பாஜக, ஏக்நாத் ஷிண்டே தலைமையிலான சிவசேனை, அஜீத் பவார் தலைமையிலான தேசியவாத காங்கிரஸ் கட்சிகள் அடங்கிய 'மகா யுதி' கூட்டணி 230 தொகுதிகளில் அமோக வெற்றிபெற்றது.

பாஜக 132 தொகுதிகளிலும், ஷிண்டே சிவசேனை 57 தொகுதிகளிலும், அஜீத் பவாரின் தேசியவாத காங்கிரஸ் 41 தொகுதிகளிலும் வெற்றி பெற்றன.

இதைத்தொடர்ந்து கடந்த டிச.5-ஆம் தேதி மும்பையில் பிரதமர் மோடி முன்னிலையில், மாநில முதல்வராக தேவேந்திர ஃபட்னவீஸ் பதவியேற்றார்.

அவருக்கு மாநில ஆளுநர் சி.பி. ராதாகிருஷ்ணன் பதவிப் பிரமாணம் செய்துவைத்தார்.

இதேபோல மாநில துணை முதல்வர்களாக ஏக்நாத் ஷிண்டே, அஜீத் பவார் ஆகியோர் பதவியேற்றனர். இதில், மூன்றாவது முறையாக ஃபட்னவீஸ் முதல்வராகவும், அஜீத் பவார் 6-ஆவது முறையாக துணை முதல்வராகவும் பதவியேற்றனர்.

இதைத்தொடர்ந்து மகாராஷ்டிர அமைச்சரவை ஞாயிற்றுக்கிழமை விரிவாக்கம் செய்யப்பட்டு, நாகபுரியில் 39 பேர் அமைச்சர்களாக பதவியேற்றனர். இவர்களில் 33 பேர் கேபினட் அமைச்சர்களாகவும், 6 பேர் இணையமைச்சர்களாகவும் பதவியேற்றனர். அவர்களுக்கு மாநில ஆளுநர் சி.பி.ராதாகிருஷ்ணன் பதவிப் பிரமாணம் செய்து வைத்தார்.