அரசமைப்புச் சட்டத்தை தனிப்பட்ட சொத்தாக கருதிய காங்கிரஸ்

'அரசமைப்புச் சட்டத்தை தங்களின் தனிப்பட்ட சொத்தாக கருதிய காங்கிரஸின் ஒரு குடும்பம், ஆட்சியில் நீடிக்க அதில் திருத்தங்களை மேற்கொண்டது' என்று மத்திய உள்துறை அமைச்சர் அமித் ஷா செவ்வாய்க்கிழமை குற்றஞ்சாட்டினார்.

அரசியல் நிர்ணய சபையால் அரசமைப்புச் சட்டம் ஏற்கப்பட்டதன் 75 ஆண்டுகள் நிறைவை ஒட்டி, மாநிலங்களவையில் நடைபெற்ற 2 நாள் விவாதத்தின் நிறைவாக செவ்வாய்க்கிழமை உரையாற்றிய அவர் இவ்வாறு தெரிவித்தார்.

மேலும், அவரது உரையில், 'உத்தரகண்டில் பாஜக அரசு ஏற்கெனவே பொது சிவில் சட்டத்தை அமல்படுத்தியுள்ளது. மற்ற மாநிலங்களிலும் பொது சிவில் சட்டம் விரைவில் கொண்டு வரப்படும்.

மகாராஷ்டிரம், ஹரியாணா பேரவைத் தேர்தல்களில் அடைந்த தோல்விக்கு மின்னணு வாக்குப்பதிவு இயந்திரங்கள் மீது குற்றஞ்சாட்டும் காங்கிரஸ், 'தோல்வி' கட்சியாகும். அக்கட்சி மீண்டும் ஆட்சிக்கு வரவேண்டுமானால் வாக்குவங்கி-வாரிசு அரசிலையும் ஊழலையும் கைவிட வேண்டும்.