அமித் ஷா பேச்சு: நாடாளுமன்றத்தில் அமளி

சட்டமேதை அம்பேத்கர் குறித்து சர்ச்சைக்குரிய வகையில் கருத்து தெரிவித்த மத்திய உள்துறை அமைச்சர் அமித் ஷா மன்னிப்பு கேட்க வேண்டும் என்று வலியுறுத்தி காங்கிரஸ் உள்ளிட்ட எதிர்க்கட்சிகள் தொடர் அமளியில் ஈடுபட்டதால் மக்களவை புதன்கிழமை நாள் முழுவதும் ஒத்திவைக்கப்பட்டது.

இதுபோல, மாநிலங்களவையிலும் இந்த விவகாரத்தை எதிர்க்கட்சிகள் எழுப்பியதால் அங்கும் அமளி நீடித்தது.

மாநிலங்களவையில் அமித் ஷா செவ்வாய்க்கிழமை உரை யாற்றியபோது, காங்கிரஸ் கட்சித் தலைவர்கள் அம்பேத்கர் பெயரையும், அரசியல் சாசனம் குறித்தும் தொடர்ச்சியாகப் பேசி வரு வதை விமர்சித்தார். 'அம்பேத்கர் பெயரை தொடர்ந்து பல முறை முழக்கமிடுவது வாடிக்கையாகி விட்டது. அதற்குப் பதிலாக கடவுளின் பெயரை இவ்வளவு முறை உச்சரித்தால், சொர்க்கத்தில் அவர்களுக்கு இடம் கிடைத்திருக்கும்' என்று குறிப்பிட்டார்.

இதற்கு காங்கிரஸ் உள்ளிட்ட எதிர்க்கட்சிகள் கடும் எதிர்ப்பு தெரிவித்தன. இந்நிலையில், மக்களவை புதன்கிழமை காலை 11 மணிக்கு கூடியபோது, அம்பேத்கர் புகைப்படத்துடன் அவைக்கு வந்த எதிர்க்கட்சி உறுப்பினர்கள் அவையின் மையப் பகுதியில் ஒன்று கூடி முழக்கங்களை எழுப்பியபடி அமளியில் ஈடுபட்டனர்.

திரிணமூல் காங்கிரஸ் உறுப்பினர்கள் அவர்களின் இருக்கை அருகே நின்றபடி காங்கிரஸின் ஆர்ப்பாட்டத்துக்கு ஆதரவு தெரிவித்தனர். இந்த அமளியின்போது எதிர்க்கட்சித் தலைவர் ராகுல் காந்தி, காங்கிரஸ் எம்.பி. பிரியங்கா காந்தி ஆகியோர் அவை யில் இருந்தனர்.

எதிர்க்கட்சி உறுப்பினர்களின் குற்றச்சாட்டுகளுக்குப் பதிலளித்துப் பேசிய மத்திய சட்ட அமைச்சர் அர்ஜுன் ராம் மேக்வால், அம்பேத்கரை காங்கிரஸ் கட்சி எப்போதும் அவமதிப்பு செய்துவந்தது. மக்களவைத் தேர்தல்களில் அவர் தோற்கடிக்கப்படுவதை காங்கிரஸ் உறுதி செய்தது. அம்பேத்கரை காங்கிரஸ் கட்சி மதிக்கவில்லை என்றபோதும், அவருடைய பெயரை உச்சரிக்க வேண்டிய கட்டாயம் காங்கிரஸுக்கு ஏற்பட்டுள்ளது' என்றார்.

அவையில் அமளி தொடர்ந்த நிலையில், கேள்வி நேரத்தை அனுமதிக்குமாறு உறுப்பினர்களை அவைத் தலைவர் ஓம் பிர்லா கேட்டுக்கொண்டார். ஆனால், அமளி தொடர்ந்ததால், அவையை பிற்பகல் 2 மணி வரை அவைத் தலைவர் ஒத்திவைத்தார்.

அவை மீண்டும் பிற்பகல் 2 மணிக்கு கூடியபோது அதே நிலை நீடித்தது. அமளிக்கிடையே மத்திய அமைச்சர்களும் எம்.பி.க்களும் ஏற்கெனவே பட்டியலிடப்பட்ட தீர்மானங்கள் மற்றும் அறிக்கைகளை அவையில் தாக்கல் செய்தனர். அதன் பின்னரும் அமளி தொடர்ந்தது. அதனால், அவையை அப்போது வழிநடத்திய பி.சி.மோகன் அவை நடவடிக்கைகளை நாள் முழுவதும் ஒத்தி வைத்தார்.